ՄԱԿ-ի Անվտանգության խորհրդում կոչ են արել ապաշրջափակել Լաչինի միջանցքը

Հայաստանի Հանրապետության խնդրանքով ՄԱԿ-ի Անվտանգության խորհրդում այսօր ժամը 24:00-ից քննարկվել է Լաչինի միջանցքում տիրող իրավիճակը։

Ֆրանսիան կոչ է արել անհապաղ և անվերապահ ապաշրջափակել Լաչինի միջանցքը։ ՄԱԿ-ում ԱՄՆ ներկայացուցիչն անընդունելի է անվանել Հայաստանի և Լեռնային Ղարաբաղի միջև տրանսպորտային հաղորդակցույան արգելափակումը և կոչ է արել անհապաղ վերականգնել Լաչինի միջանցքով տրանսպորտի երթևեկությունը, այդ թվում՝ մարդասիրական բեռներինը։

Ռուսաստանն ակնկալում է, որ մոտ ապագայում Լաչինի միջանցքով տրանսպորտային միջոցների տեղաշարժը լիովին կվերականգնվի, ասել է ՌԴ ներկայացուցիչը։ Նա նշել է, որ Ռուսաստանը ձեռնարկում է բոլոր անհրաժեշտ միջոցները Լաչինի միջանցքի շուրջ ստեղծված իրավիճակը հնարավորինս արագ կարգավորելու համար։

Մեծ Բրիտանիան նաև կոչ է արել անհապաղ բացել Լաչինի միջանցքը։ ՄԱԿ-ում Մեծ Բրիտանիայի ներկայացուցիչը նշել է, որ այս միջանցքի մեկ շաբաթից ավելի փակումը կարող է ծանր հումանիտար հետևանքներ ունենալ, հատկապես ձմռանը։

Բրազիլիայի ներկայացուցչի խոսքով, Լաչինի միջանցքով ճանապարհորդելու ցանկացած խոչընդոտ վտանգում է Լեռնային Ղարաբաղի բնակչությանը և սպառնում Հայաստանի և Ադրբեջանի միջև խաղաղ գործընթացին։

Լաչինի միջանցքը ապաշրջափակելու կոչեր են արել նաև Քենիայի, Մեքսիկայի, Նորվեգիայի, Իռլանդիայի և Հնդկաստանի ներկայացուցիչները։

ԱՄԷ-ն անհանգստացած է Հայաստանի և Ադրբեջանի միջև վերջին շրջանում լարվածության աճով։ ՄԱԿ-ում ԱՄԷ ներկայացուցիչը հայտնել է իր երկրի սկզբունքային դիրքորոշումը, որ հակամարտության ռազմական լուծում չի կարող լինել՝ կոչ անելով կողմերին կարգավորել տարաձայնությունները խաղաղ դիվանագիտական ճանապարհով։

Աղբյուր` news.am