Իրանական մամուլը մեկնաբանելով Լաչինի միջանցքի շուրջ իրադարձություններն ավելի շատ բարիացկամ է հայերի հանդեպ

Լաչինի միջանցքի շուրջ իրադարձությւունները լայնորեն մեկնաբանվում են նաև իրանական լրատվամիջոցներում: եվ ամենահետաքրքիրն այն է, որ թեև պաշտոնական Թեհրանը Արցախը դիրտարկում է, որպես Ադրբեջանի մաս, այնուամենայնիվ, իր լրատվամիջոցներում արցախցիներին բնութագրում է, որպես «Լոռնային Ղարաբաղի ժողովուրդ» ձևակերպմամբ: Իրանում ոչ մի ձևակերպում հենց այնպես չի կատարվում: Իհարկե, այս երկրում կան նաև լրատվամիջոցներ, որոնք դրական են տրամադրված Ադրբեջանի հանդեպ, սակայն այն լրատվամիջոցները, որոնք ակնհայտորեն կապված են պաշտոնական շրջանակների հետ, ընդգծված հայամետ դիրքորոշումներով են հանդես գալիս: Եվ դա այն դեպքում, երբ պաշտոնական Թեհրանը Արցախը ճանաչում է, որպես Ադրբեջանի մաս:

Իսկ դա նշանակում է մեկ բան, Իրանը մտահոգված է արցախյան վերջին պատերազմի արդյունքներով: Եվ իր այդ մտահոգությունը, փաստացի, չի թաքցնում: Ավելին, այն կարծիքին է, որ այդ պատերազմի արդյունքները պայմանավորված են, ոչ թե Ադրբեջանի բանակի հաղթանակով, այլ իր դաշնակից Թուրքիայի և Իսրայելի աջակցությամբ է դա իրականացվել: Իսկ դրա արդյունքում, Ադրբեջանին աջակցող երկրները պահանջելու են իրենից հատուցում:

Եւ Իրանում կարծում են, որ այդ հատուցման գինը կարող է լինել հենց իրենց հաշվին:

Վկան, Իսրայելի և Թուրքիայի ՊՆ ղեկավարների այցն է Բաքու, որտեղ նրանք եռակողմ հանդիպում ունեցան Ադրբեջանի ՊՆ ղեկավարի հետ:

Իսկ ահա վերջերս Ադրբեջան է այցելել Սաուդյան Արաբիայի բարձրաստիճան ղեկավարներից մեկը և խոստացել, որ իր երկիրը ներդրումներ կիրականացնի Ադրբեջանի «ազատագրված» տարածքներում:

Իրանական լրատվամիջոցները հիշեցնում են, որ երկար ժամանակ է, ինչ Ադրբեջան չէր այցելել Սաուդյան Արաբիայի ներկայացուցիչը: Իսկ այդ երկիրը հայտնի է, որ այսօր վատ հարաբերությունների մեջ է Իրանի հետ:

Իրանցիները բոլոր այս զարգացումները նաև շաղկապում են իրենց երկրում ընթացած ներքին զարգացումների հետ և նշում են, որ դա մեկ միասնական շղթա է, որի գլխավոր թիրախը հենց իրենց երկիրն է:

Արտակ Հակոբյան