Մենք չենք լինելու Ադրբեջանի կազմում, որովհետև դա մահ է, կործանում՝ ոչ միայն Արցախի, այլև Հայաստանի

«Մենք ունենք հստակ ձեւակերպված կարմիր գիծ, որի մասին անընդհատ խոսում ենք՝ ոչ թե հիշեցնելու այդ մասին ինչ-որ մեկին, այլ խաղի կանոններն են այդպիսիոն՝ մենք պետք է անընդհատ հայտնեք, որ մեր տեսլականը չի փոխվել։ Այդ կարմիր գիծը համընդհանուր է, ոչ միայն իշխանությանն է, այլեւ ամբողջ հանրության ընդհանուր կամքն է, նաեւ ամբողջ հայության։ Այդ կարմիր գիծը հետեւյալն է՝ Արցախը չի կարող լինել Ադրբեջանի կազմում, դա բացառված է»,-«Փաստինֆո»-ի հետ զրույցում այս մասին հայտնեց Արցախի Հանրապետության ԱԳ նախարար Դավիթ Բաբայանը՝ անդրադառնալով Հայաստանի եւ Ադրբեջանի միջեւ խաղաղության հնարավոր պայմանագրին, որի նախապատրաստական աշխտանքների մեկնարկը տալու մասին հայտարարվեց Բրյուսելում Շառլ Միշելի միջնորդությամբ կայացած Փաշինյան, Ալիեւ, Միշել եռակողմ հանդիպման արդյուքներով ։

Հայտարարվել էր, որ ԱԳ նախարարներին հանձնարարվել է այդ ուղղությամբ սկսել աշխատել։ Ուշագրավ է որ ՀՀ վարչապետ Փաշինյանը ԱԺ-ում ունեցած ելույթներից մեկում հայտարարել էր, որ կա գաղափար՝ ԼՂ հարցը տարանջատել Հայաստան-Ադրբեջան հարաբերություններից: «Մենք հիմա ակտիվորեն պիտի քննարկենք այդ տարբերակը եւ որոշենք ինչպես առաջ ընթանալ»: Սակայն բրյուսելյան օրակարգում ընդհանրապես ԼՂ մասին խոսք չկար։

ԱՀ ԱԳ նախարարը շեշտեց՝ երբ խոսում է կարմիր գծերի մասին, պետք է նկատի ունենալ այդ թվում՝ որեւէ կարգավիճակով Ադրբեջանի կազմում չլինելու մասին է, որովհետեւ հակառակը կնշանակի, օրինակ, որ հրեաները նացիստական Գերմանիայում ունենային ինքնավարություն։ « Նրանք ունեցել են ինքնավարություն։ Այդ համակենտրոնացման ճամբարները ինչ-որ տեղ ինքնավարությունների կենտրոններ էին, այսինքն, նրանք իրավունքներ ունեին՝ օրվա մեջ տասը րոպե կարող էին քայլել, ինչ երազ ուզում էին, կարող էին տեսնել։ Նույնը Ադրբեջանի կազմում գտնվելու մասին է»,-նկատեց Բաբայանը՝ շեշտելով, որ բնականաբար, Ադրբեջանը ձգտում է այդ խաղաղության հնարավոր պայմանագրի մեջ մի կետ խցկել, որով Հայաստանը կճանաչի Ադրբեջանի տարածքային ամբողջականությումը՝ Արցախի հետ մեկտեղ։

Ըստ Բաբայանի, բնական է, որ Հայաստանը դա չի կարող ընդունել եւ սա ամենակարեւորն է։«Արցախի փոխարեն որեւէ մեկը չի կարող որոշում կայացնել, եթե նման որոշում կայացվի, ով ուզում է լինի, ուզում է՝ ՄԱԿ-ը կայացնի, այստեղ լինելու է համապատասխան ռեակցիա, այսինքն, մենք չենք տեսնում մեզ Ադրբեջանի կազմում»։

«Փաստինֆո»-ի ճշտող հարցին, թե այդ թվում պաշտոնական Երեւանը լիազորված չէ՞ Արցախի անունից որեւէ որոշում կայացնելու, Դավիթ Բաբայանը նշեց․ « Կապ չունի,թե ով է, չեմ էլ ուզում կարծել, որ պաշտոնական Երեւանը, ով էլ լինի, հայ մարդու մասին խոսքը, կարող է ստորագրել մի բան, որով Արցախը դառնա Ադրբեջանի մաս, ես չեմ պատկերացնում, չեմ էլ ուզում պատկերացնել, բայց եթե նույնիսկ ամբողջ աշխարհը նման բան որոշի, ելքը լինելու կամ նոր պատերազմն ու ցեղասպանությունը կամ , պարզապես, Արցախի հայաթափումը, իսկ դրանից հետո, արդեն այնպիսի աշխարհաքաղաքական լանդշաֆտի այնպիսի խորը փոփոխություններ են տեղի ունենալու, որ շատ ու շատ երկրների համար, իսկապես, սարսափելի գոյաբանական վտանգենր են առաջանալու, բայց դա չի լինելու արդեն միայն մեր խնդիրը։

Հարցին, եթե այդուհանդերձ, իրադարձություններն այնպես զարգանան, որ պաշտոնական Երեւանը նման փաստաթուղթ ստորագրի, հնարավո՞ր է, որ պաշտոնական Ստեփանակերտը, հաշվի առնելով ռուսական խաղաղապահ ներկայությունն Արցախում, ուղիղ դիմի ՌԴ-ին՝ անվտանգության երաշխիքների խնդրանքով, Դավիթ Բաբայանն ասաց․«Եթե որեւէ մեկը վաղը ասի, որ դուք պետք է Ադրբեջանի կազմում լինեք, կրկնում եմ՝ ելքը երկուսն է՝ կամ պատերազմ, կոտորած կամ հայաթափում, օրինակ կարող է այնպես լինել, որ կանայք եւ երեխաները դուրս գան, իսկ տղամարդիկ պայքարեն մինչեւ մահ, սա էլ է տարբերակ, բայց մենք չենք լինելու այդ երկրի կազմում, որովհետեւ դա մահ է, կործանում՝ ոչ միայն Արցախի, այլեւ Հայաստանի։ Չեմ կարծում, որ նմաս սցենար կլինի»։

Ինչ վերաբերում է Երեւան-Ստեփանակերտ շփումներին ու հնարավոր խորհրդակցություններին, ապա Բաբայանն ասաց, որ երկրների ղեկավարները շփվում են, կոմունիկացիան կա։

Աղբյուր` Փաստինֆո