Փաշինյանի՝ Արցախը հանձնելու չարաբաստիկ ծրագիրը կյանքի չի կոչվելու. Բրյուսելյան հանդիպմանը Արցախի պաշտոնական արձագանքը չի ուշանա. արցախցի խորհրդարանական

Եվրոպական խորհրդի նախագահ Շառլ Միշելի հայտարարությունը՝ բրյուսելյան երեկվա հանդիպման մասին, ապրիլի 8-ի շարունակությունն էր․ «Փաստինֆո»-ի հետ զրույցում նման գնահատական հնչեցրեց Արցախի ԱԺ պատգամավոր, «Արդարություն» խմբակցության ղեկավար Դավիթ Գալստյանը։

«Երբ վերադառնալով ապրիլի 8-ի բրյուսելյան հանդիպումից՝ Նիկոլ Փաշինյանը ՀՀ ԱԺ-ում հայտարարեց, թե միջազգային հանրությունը պահանջում է Արցախի հարցում նշաձողի իջեցնում, նա ոչ թե ուղղակի ինֆորմացիա է տվել, այլ փաստել է, որ այդ հարցում ինքը տվել է իր համաձայնությունը՝ չունենալով այդ իրավունքը»,-մեզ հետ զրույցում ասաց արցախցի պատգամավորը՝ շեշտելով, որ Արցախը Նիկոլ Փաշինյանին տվել է միջազգային հարթակներում բացառապես Արցախի ժողովրդի ինքնորոշման և անկախության հարցերի շուրջ բանակցելու մանդատ։

Գալստյանի արձանագրմամբ՝ հայկական կողմի պարտությունների շարանը նաև դիվանագիտական հարթակում լրջորեն վտանգում է արցախահայության անվտանգությունը։ Այդուհանդերձ, արցախցի խորհրդարանականը վստահ է, որ Փաշինյանի՝ Արցախը հանձնելու չարաբաստիկ ծրագիրը կյանքի չի կոչվելու։

«Անկախ նրանից, թե ինչ են հայտարարում Բրյուսելում, Արցախում ապրող հայությունը թույլ չի տալու ինչ-որ մեկին, ով բախտի բերմամբ հայտնվել է հայ ժողովրդի առաջնորդի դերում, նմանատիպ ազգակործան որոշումներ կայացնի և կյանքի կոչի։ Ի վերջո, Նիկոլ Փաշինյանը լեգիտիմ չէ․ նա սեփական երկրում ոստիկանական զորքերի հետևում թաքնված, միջազգային հանրության դիմաց էլ կզած քաղաքական գործիչ է դարձել»,-ասաց Գալստյանը։

Բրյուսելյան հանդիպման՝ մասնավորապես Միշելի հայտարարության վերաբերյալ պաշտոնական արձագանք Արցախից առայժմ չի հնչել։ Գալստյանի համոզմամբ՝ այդ արձագանքը չի ուշանալու։

«Արցախի իշխանությունները՝ ի դեմս նախագահ Արայիկ Հարությունյանի, պետք է հստակ արտահայտեն իրենց դիրքորոշումը։ Փաստորեն, ապրիլի 14-ի Արցախի Աժ հայտարարությունը չի սթափեցրել Նիկոլ Փաշինյանին, հետևաբար պետք է ամեն կերպ հետ պահել նրան ազգակործան այդ պլանից»,-շեշտեց պատգամավորը և հավելեց, որ եթե Փաշինյանը չի կարողանում պաշտպանել հայկական շահը, պետք է օր առաջ հրաժարական տա։ Ըստ նրա՝ նույն ճանապարհով պետք է գնան նաև Արցախի իշխանությունները, եթե անհապաղ չարձագանքեն արցախահայության անվտանգությունն ու Արցախի ինքնորոշման իրավունքը վտանգող հայտարարություններին։

Արցախի հիմնահարցը ԵՄ ներկայացուցչի հետ քննարկելու հերթական քայլը, ըստ Գալստյանի, վկայում է այն մասին, որ ԵԱՀԿ Մինսկի խմբի անօգտակարության մասին ադրբեջանական կողմի պնդումներին Նիկոլ Փաշինյանն առնվազն չի հակադարձել։

«Երբ Ադրբեջանը հայտարարեց, որ Մինսկի խմբի ձևաչափը չի աշխատում, նա, հավանաբար, Նիկոլ Փաշինյանի հետ համաձայնության էր եկել արդեն։ Եթե Մինսկի խմբի ձևաչափով Արցախի հարցը չի քննարկվում, կարելի է ենթադրել, որ երկու կողմն էլ՝ ադրբեջանականը՝ բարձրաձայն, հայկականը՝ լուռ, իրենց համաձայնությունը տվել են այդ հարցին։ Ի վերջո, եթե Նիկոլ Փաշինյանն իրոք ցանկանար, որ Մինսկի խմբից դուրս չբերվի արցախյան հիմնահարցը, ապա ուղղակի կհրաժարվեր այլ հարթակում այդ հարցը քննարկել ։ Հիմա նա պետք է շատ արագ որոշում կայացնի՝ իր աթոռն է կարևոր, թե՝ Արցախը։ Եթե նա կրկին ընտրեց իր աթոռը, ապա արցախահայությունը ոտքի է կանգնելու և, նա չի կարողանալու մարսել իր այդ որոշումը»,-վստահեցրեց պատգամավորը։

Աղբյուր` Փաստինֆո