ՆԱՏՕ-ի գլխավոր քարտուղարը խուսափել է Ուկրաինային օգնություն տրամադրելու մասին հարցին պատասխանելուց

ՆԱՏՕ-ի գլխավոր քարտուղար Յենս Սթոլթենբերգը Բրյուսելում հատուկ ճեպազրույցում խոսել է Ուկրաինայի վրա Ռուսաստանի հարձակման մասին, սակայն ուղիղ պատասխան չի տվել, թե արդյոք դաշինքը ռազմական օգնություն կտրամադրի, գրում է eurointegration-ը։ 

«ՆԱՏՕ-ն աջակցում է Ուկրաինային, ինչպես նաեւ գործընկերներին ամբողջ աշխարհում։ ՆԱՏՕ-ի դաշնակիցները նույնպես երկար ժամանակ գործնական աջակցություն են ցուցաբերում՝ Ուկրաինայի Զինված ուժերի հզորացման համար»,-ասել է նա։ 

Գլխավոր քարտուղարին ուղիղ հարցրել են, թե արդյոք ՆԱՏՕ-ն նախատեսում է զորքեր ուղարկել Ուկրաինայի տարածք, ինչին նա պատասխանել է, որ «ՆԱՏՕ-ն կպաշտպանի իր բոլոր դաշնակիցներին հարձակման դեպքում, եւ հետեւաբար արեւելյան թեւում ներկայությունն ավելացել է հազարավոր զինվորականներով, նավերով եւ  ինքնաթիռներով»:

Երբ երկրորդ անգամ են նույն հարցն ուղել, Սթոլթենբերգը պատասխանել է․ «Ռուսաստանը փակել է դիվանագիտական ​​լուծման դուռը»։

Ավելի ուշ Սթոլթենբերգը հավելել է, որ ՆԱՏՕ-ն Ուկրաինայում զորքեր չունի եւ չի ծրագրում զորքեր ուղարկել։

Աղբյուր՝ NEWS.am