«Փաշինյանին ասել են՝ դավայ, ստորագրի. քաղաքականության մեջ դա կոչվում է փչացնել». Տիգրան Քոչարյան. Տեսանյութ

Մեդիափորձագետ Տիգրան Քոչարյանի կարծիքով՝ Նիկոլ Փաշինյանին ոչ ոք չի հարցրել՝ կո՞ղմ է Ղազախստան ՀԱՊԿ խաղաղապահ ուժեր ուղարկելուն, թե՞ ոչ:

«Նրան ասել են՝ հայտարարությունը կգրես, նա էլ ուղղագրական սխալներով է գրել, այսինքն՝ մի բան են վստահել, դա էլ նորմալ չի կարողացել անել»,-168TV-ի «Ռեվյու» հաղորդման ընթացքում ասաց նա:

Ինչ վերաբերում է Ղազախստանում կատարվող իրադարձություններին, ապա, ըստ Տիգրան Քոչարյանի՝ սպասվող Բայդեն-Պուտին հանդիպումից առաջ Արևմուտքը ստեղծեց ևս մեկ լարվածության օջախ.

«Դա Ռուսաստանի համար պետք է ևս մեկ տհաճ անակնկալ լիներ, և փորձեին Ռուսաստանին շեղել ուկրաինական ճակատից: Այն, ինչ եղավ Ղազախստանում, շատ կազմակերպված գործողություն էր՝ երկար տարիներ մշակված, ցանցը վաղուց ստեղծված էր: Ուղղակի այս ցանցը որոշեցին հիմա աշխատեցնել ընդդեմ Ռուսաստանի, չնայած՝ մյուս տարի կամ ավելի ուշ պետք է ինքն իր սև գործողությունն աներ, բայց քանի որ անպայման պետք էր ուկրաինական բանակցային պրոցեսում Ռուսաստանի դիրքերը թուլացնել, դրա համար դրվեց ղազախական գործողության պլանը»:

Փորձագետի գնահատմամբ՝ ՀԱՊԿ-ը, առաջին հերթին, Ռուսաստանն է, և խառնվելով ղազախական գործընթացում՝ մի քանի աշխարհաքաղաքական խնդիր լուծեց Ռուսաստանը.

«Եթե առաջին օրն իրավիճակն ապստամբների ձեռքում էր, և թվում էր արդեն, որ ղազախական իշխանության ժամերը հաշված են, հիմա մենք հակառակ պատկերն ենք տեսնում, որ Ղազախստանի նախագահը, տեսնելով, որ ՀԱՊԿ դաշնակիցներն իր մեջքին կանգնած են, արդեն հակագրոհ է սկսել, և այս ճոճանակը ճոճվելու է հօգուտ Ղազախստանի նախագահի»:

Տիգրան Քոչարյանը նկատեց՝ նույն բանը նաև Հայաստանում է տեղի ունեցել 2008 և 2018 թվականներին՝ մի փոքր տարբերություններով.

«Ցանցերը, որոնք տարիների ընթացքում ստեղծվել են, և որոնք ներգրավում են ուժայիններին և այլն, ստեղծվում և պահպանվում են հենց այս պրոցեսների համար, երբ պետք է ժողովուրդ հանել, և ցանցի տարբեր դերակատարները տարբեր գործողություններ պետք է անեն: Օրինակ՝ ոստիկանը պետք է չհարձակվի, զինվորականը պետք է չպաշտպանի կարևոր ռազմավարական օբյեկտը, ղեկավարի խորհրդականները պետք է սխալ ինֆորմացիա տան, որպեսզի այնպես անեն, որ պետք եղած ժամանակ մի քանի հազար ժողովուրդ հանեն փողոց, և ներսի համակարգը փլվի, որովհետև սաբոտաժի միջոցով պետք է լինի: Դա՛ եղավ Ղազախստանում»:

Մեդիափորձագետը ընդգծեց՝ ժողովուրդը երբեք ինքն իրենով որևէ հարց չի լուծում՝ ո՛չ գազի գինն է նվազեցնում, ո՛չ իշխանափոխություն է անում, և այլն.

«Ժողովրդի միջոցով կա՛մ ներսի, կա՛մ աշխարհաքաղաքական էլիտաները հարցեր են լուծում, և եթե երկրում տեղի է ունենում իշխանափոխություն, կա՛մ ներքին էլիտաների մեջ պետք է ճաք լինի, կա՛մ արտաքին ուժերի կոնսենսուսը պետք է խախտված լինի: Ղազախստանում Ռուսաստանը կանխատեսել էր, որ նման բան կարող է լինել, դրա համար շատ կազմակերպված և շատ արագ հակընդդեմ միջոցներ կիրառեցին: Մենք տեսանք, որ Ղազախստանում ներքին հեղաշրջում եղավ, որովհետև Նազարբաևին զրկեցին Անվտանգության խորհրդի ղեկավարի պաշտոնից: Նազարբաևականներին ևս պաշտոններից հեռացրին: Փաստորեն, եթե այն վարկածը կա, որ սա Նազարբաևն ու նրան օժանդակող ուժերն են կազմակերպել, այստեղ մեկ հարց առնվազն լուծվեց՝ Նազարբաևն այլևս իշխանության գլխին չի լինելու»:

Անդրադառնալով ԱԽ քարտուղար Արմեն Գրիգորյանի հայտարարությանը, թե Ղազախստանում ոչ թե հեղափոխական, այլ՝ ահաբեկչական գործողություններ էին, Տիգրան Քոչարյանը հետևյալն ասաց.

«2008թ. մարտի 1-ին Հայաստանում ահաբեկչական գործողություններ են տեղի ունեցել, որի պարագլուխներից մեկը եղել է ներկայիս վարչապետը, որը դրա համար դատվել է և համաներման է ենթարկվել, ինչը նշանակում է, որ իր մեղավորությունն ընդունել է՝ որպես կազմակերպիչ, և հիմնական պատասխանատուներից է Մարտի 1-ի համար: Եթե հիմա իրենք ղազախական դեպքերը ներկայացնում են՝ որպես ահաբեկչություն, ապա այո, այն, ինչ իրենք արել են Մարտի 1-ին, դա ևս ահաբեկչություն է:

Հիշո՞ւմ եք՝ ինչ թալան էր տեղի ունենում Մարտի 1-ին. հիմա նույնը Ղազախստանում է: Երբ Արմեն Գրիգորյանը գնահատականներ է տալիս Ղազախստանի դեպքերին, պետք է հասկանա, որ նույն բաներն իրենք արել են 2008թ. մարտի 1-ին և նույն բանը պատրաստ էին անել 2018թ. ապրիլին, երբ, օրինակ՝ Ռադիոտան դռները ջարդելով՝ ներս էին մտել և պատրաստ էին ավելին անել»:

Ինչ վերաբերում է Ղազախստան հայկական զորախումբ ուղարկելուն, նա նկատեց. «Շատ արևմտամետներ վատացան, որ ՀԱՊԿ-ն ինչ-որ գործողություն արեց, իսկ այստեղ տարբեր մարդիկ ամեն ինչ անում էին, որպեսզի ՀԱՊԿ-ը պախարակեին: Նույն Նիկոլ Փաշինյանն ամենամեծ հարվածը հասցրեց ՀԱՊԿ-ի հեղինակությանը, երբ կալանավորեց Յուրի Խաչատուրովին: Հայաստանը՝ որպես դաշնակից, պարտավոր էր այդ ամենն անել, բայց հետաքրքիրն այն է, որ դա ճակատագրի քամահրանքն էր, թե հատուկ էր այդպես արված, որ Նիկոլ Փաշինյանին, կոպիտ ասած՝ թաթախեցին հենց իր արածների մեջ։ Այսինքն՝ մարդը, որը Հայաստանը ՀԱՊԿ-ից դուրս էր հանում, Խաչատուրով էր բռնում, ապակառուցողական բաներ էր անում, փորձում էր Սև լճի տարածքում և Վարդենիսում ադրբեջանցիների առաջխաղացման մեջ մեղադրել ՀԱՊԿ-ին, հիմա բերեցին՝ դարձրեցին ՀԱՊԿ անվտանգության խորհրդի նախագահ և ասացին՝ նախագահ ես՝ դե ստորագրիր: Քաղաքականության մեջ դա կոչվում է փչացնել, բայց քանի որ նա սովոր է այդ ամենին, դա էլ արեց, որ մի օր ասի՝ Վլադիմիր Վլադիմիրովիչ, տես՝ ես սա էլ եմ արել՝ հանուն քեզ, ինձ լավ վերաբերվեք: Մարդը, որ ամբողջ կյանքն աշխատել է ՀԱՊԿ-ի դեմ, հիմա արեց իր և իր կողմնակիցների մտածած ամենավատ քայլը՝ ստորագրեց զորք մտցնելու տակ:

Փաշինյանին առնվազն ղազախները և ամբողջ դեմոկրատական լիբերալ տուսովկան, որի անդամներից մեկը ինքն է, հիշելու են: Դա ևս մեկ անգամ ցույց տվեց, որ Փաշինյանը պատրաստ է ամեն ինչ անել, միայն թե մեկ օր ավել մնա իշխանության: Փաշինյանին ասել են՝ դավայ, ստորագրի: Իրականում չի հասկանում, որ գլոբալ առումով իրեն «թարս կապուտ» են արել»:

Մանրամասները՝ 168TV-ի տեսանյութում։