Ռուս խաղաղապահներն ապահովում են հրադադարի ռեժիմի վերահսկողությունը Լեռնային Ղարաբաղում

Դիտորդական կետերում գտնվող ռուսական խաղաղապահ զորախմբի զինծառայողները շուրջօրյա ապահովում են տրանսպորտային միջոցների եւ մարդկանց անվտանգ մուտքն ու ելքը Լեռնային Ղարաբաղի Լաչինի միջանցքով: Այս մասին հայտնում է ՌԴ ՊՆ մամուլի ծառայությունը:

Գիշերային ծառայություն իրականացնելու համար խաղաղապահ զորախմբի ռուս զինվորականներն անդրադարձնող տարրերով «Ռատնիկ» կոստյումներ են կրում: Դիտորդական կետերը հագեցած են ժամանակակից լուսադիոդային լուսարձակներով եւ անխափան էլեկտրական սնուցման սարքերով:

«Ցուցադրում ենք ռուսական խաղաղապահ զորախմբի ներկայությունը: Ապահովում ենք տարանցիկ երթեւեկության անվտանգությունը: Անհրաժեշտության դեպքում յուրաքանչյուր ավտոմեքենա ենթակա է ստուգման: Ծառայությունն իրականացվում է ինչպես ցերեկը, այնպես էլ գիշերը: Գիշերը մեր հագուստը լույսն արտացոլող տարրեր է պարունակում` ճանապարհին անվտանգ ծառայության իրականացման համար»,- ասել է ռուսական խաղաղապահ զորախմբի ներկայացուցիչ Ալեքսանդր Ռիպսկին:

Ընթացիկ իրավիճակի վերահսկման համար բոլոր դիտակետերը հագեցած են արտաքին տեսահսկման գմբեթավոր տեսախցիկներով: