Բաքուն և Անկարան այժմ էլ ավիացիոն զորավարժություններ են անցկացնում, «ոչնչացնելով հակառակորդի ինքնաթիռները»

Թուրքիայի Քոնյա քաղաքում շարունակվում են սեպտեմբերի 3-ին մեկնարկած Ադրբեջանի և Թուրքիայի համատեղ «ԹուրԱզ շահին» («ԹուրԱզ բազե») զորավարժությանը, որին մասնակցելու նպատակով Թուրքիա են մեկնել Ադրբեջանի ՌՕՈւ ինքնաթիռները և անձնակազմը:

Ինչպես հաղորդում է ադրբեջանական «Haqqin.az» կայքը Ադրբեջանի ՊՆ-ին հղելով, զորավարժությունների պլանի համաձայն ադրբեջանցի և թուրք ռազմական օդաչուները մարտական թռիչքներ են իրականացրել ցերեկային ժամերին։ 

Համաձայն պլանի, թուրք և ադրբեջանցի ռազմական օդաչուները համատեղ օպերացիայի ժամանակ հաջողությամբ կատարել են պայմանական հակառակորդի ՀՕՊ միջոցների, ստրատեգիական օբյեկտների և ինքնաթիռների, որոնք պաշտպանում էին այդ օբյեկտները, ոչնչացման խնդիրը։ 

Ադրբեջանական կողմից զորավարժությանը մասնակցում է 2 միավոր ՄիԳ-29 կործանիչ և 3 միավոր Սու-25 գրոհիչ: Ադրբեջանի ՊՆ հրապարակման մեջ երևում է նաև Իլ-76 բեռնատար ինքնաթիռ:

Նշված է, որ զորավարժությունները տևելու են մինչև սեպտեմբերի 17-ը։

Zham.am