«Երկիր Ծիրանի»-ն չի մասնակցի ԱԺ արտահերթ ընտրություններին․ հայտարարություն

«Երկիր Ծիրանի» կուսակցությունը հայտարարություն է տարածել․ «Անկախ Հայաստանի վերջին շուրջ երեսուն տարում մենք ունեցել ենք մեկ Գերագույն խորհուրդ և յոթ Ազգային ժողով: Մեր բոլոր խորհրդարաններն էլ ձևավորվել են Հայկական պետականության շուրջ 42.000 քառ. կմ տարածքի նկատմամբ հայ ազգի իրավազորության պայմաններում, չնայած որ իրավական բովանդակությամբ մեր Արցախյան հատվածը թողնվել էր դե-յուրե չճանաչված` վիճելի միավոր:

Այս երեսուն տարիների ընթացքում մենք՝ հայերս, լռակյաց կրում էինք այն գաղափարը, որ Արցախը մեր Հայրենիքն է և ազգային կարողություններով պետք է պաշտպանենք մեր Հայրենիքը: Սակայն միջազգայնորեն ճանաչված կարգավիճակ ունեցող Հայաստանի Հանրապետությունն ի զորու չեղավ դե-ֆակտո ազատագրված Արցախը Անկախ և Միացյալ Հայաստանի համազգային տեսլականից բխող պետական քաղաքականության հարց ձևակերպել և լուծել, ինչն էլ այսօր հանգեցրեց Հայկական պետականության լինելիության հարցականին:

2018 թվականին իշխանության բերված խմբակը` Նիկոլ Փաշինյանի գլխավորությամբ, ամբողջովին խաթարեց հայկական իրավազորությունը ազատագրված Արցախի նկատմամբ և այժմ էլ լծվել է Հայաստանի Հանրապետության նկատմամբ հայկական իրավազորության վերացմանը: Նիկոլ Փաշինյանի գլխավորությամբ այդ խմբակը կարողացավ մոլորեցնել հանրությանը և հայ ժողովրդին, բեմադրված պատերազմով պատճառելով տասնյակ հազարավոր զոհեր, վիրավորներ, անհետ կորածներ ու գերիներ՝ թշնամուն հանձնեց հայոց Արցախից շուրջ 10.000 քառ. կմ տարածք: Հայրենիքի կործանարար հանձնումից հետո մենք ականատես եղանք ցեղասպան և հայրենազրկման ծրագիր իրականացնողների բեմադրության հաջորդ արարին` նրանք թույլ տվեցին, որ թշնամին մտնի և դիրքավորվի Գեղարքունիքի ու Սյունիքի մարզերում: Օրեր առաջ նրանք առանց կաշկանդվելու հայտարարեցին, որ մոտ ժամանակում նախատեսում են հանձնել կարևոր բարձունքներ Հայաստանի Հանրապետության Արարատի, Սյունիքի, Տավուշի և Գեղարքունիքի մարզերից:

Ցեղասպան և հայրենազրկման ծրագիր իրականացնողները, այսպես կոչված՝ «ԱԺ արտահերթ ընտրությունների» կազմակերպմամբ ավելի են շեղում հայերին արդի մարտահրավերներից: Իշխանության բերված խմբակը գլխավորող Նիկոլ Փաշինյանը, ներկայացնելով կեղծ հրաժարական և պարտադրելով կեղծ, այսպես կոչված՝ «ԱԺ արտահերթ ընտրությունների» օրակարգ, թմրեցնում է հասարակության զգոնությունն ու շարունակում իրականացնել հայ ազգի պառակտումը: Միևնույն ժամանակ՝ Նիկոլ Փաշինյանի կողմից կազմակերպված, այսպես կոչված՝ «ԱԺ արտահերթ ընտրությունների» պատվիրատուներն ուսումնասիրում են քաղաքականապես անկեղծ, ակտիվ հայերին՝ նրանց ծրագրերը, այդ ծրագրերի հետևից գնացողներին, և իհարկե, իրենց կողմից ներդրված, այսպես կոչված՝ «առաջնորդների» ունակություններն ու կարողությունները՝ ցեղասպան և հայրենազրկման ծրագիրն իրենց ուզած ավարտին հասցնելու համատեքստում:

Արցախը հանձնած և Հայաստանի Հանրապետության տարածքային ամբողջականության խախտում թույլ տված, Հայրենիքից նորից թշնամուն հող տալու մտադրություն ունեցող, հրաժարական տված, սակայն իշխանության ղեկն իր ձեռքում պահողի դեմ պայքարելը, այսպես կոչված` «ԱԺ արտահերթ ընտրություններին» պաշտոնապես մասնակցելը՝ «Երկիր Ծիրանի» կուսակցությունը գտնում է ոչ արդյունավետ և ոչ նպատակահարմար: Միևնույն ժամանակ` «Երկիր Ծիրանի» կուսակցությունը անվերապահորեն հաջողություն է մաղթում բոլոր նրանց, ովքեր, այսպես կոչված` «ԱԺ արտահերթ ընտրություններ» գործողությունը կվերածեն Նիկոլ Փաշինյանի գլխավորած խմբակի տապալմանը, քաղաքականապես ոչնչացմանը, ցեղասպանության և հայրենազրկման դատապարտմանը` դատավճռի կայացմանը:

Մեր Հայրենիքի ազատագրումը օտար, առավել ևս թուրքական շահերի սպասարկուներից` հայ ազգի այսօրվա կարևորագույն գործն է, այդ թվում՝ «Երկիր Ծիրանի» կուսակցության գործը»: