Զինվորականները նամակում սատարել են Ֆրանսիայի փլուզման մասին նախազգուշացրած գեներալներին

Ֆրանսիայի գործող զինվորականները բաց նամակով սատարել են իրենց նախորդների կոչին, ովքեր հայտարարել էին երկրի «կազմալուծման» մասին: Valeurs actuelles պարբերականը հրապարակել է ավելի քան 40.000 ստորագրությամբ նամակը: Փոխանցում է NEWS.am-ը:

 

«Մեր ավագ ընկերները մարտիկներ են, ովքեր արժանի են հարգանքի: Օրինակ՝ դրանք այն տարեց զինվորականներն են, որոնց պատիվը ոտնահարվել է վերջին շաբաթների ընթացքում: Դրանք Ֆրանսիայի հազարավոր ծառաներն են, ովքեր բաց նամակ են ստորագրել առողջ բանականությամբ, զինվորներ, ովքեր իրենց լավագույն տարիներն են տվել  պաշտպանելով մեր ազատությունը, ենթարկվելով պատերազմ սկսելու ձեր հրամաններին: Դուք նրանց ապստամբների պես եք վերաբերվում՝ չնայած նրանց միակ մեղքն այն է, որ նրանք սիրում են իրենց երկիրը եւ սգում են դրա ակնհայտ անկումը»,- ասված է զինծառայողների՝ Ֆրանսիայի իշխանություններին ուղղված նամակում, հաղորդում է «ՌԻԱ Նովոստի»-ն:

 

Վերջերս իրենց ծառայությունը սկսած զինվորականները հայտարարել են, որ իրենց խնդիրն է երկրի նկատմամբ սիրուց դրդված հայտնել ճշմարտությունը:

 

«Մենք տեսնում ենք բռնությունը մեր քաղաքներում եւ գյուղերում: Մենք տեսնում ենք, թե ինչպես է համայնքների պառակտումը ապրապնդվում հանրային տարածքում, հանրային քննարկումներում: Մենք տեսնում ենք, որ Ֆրանսիայի եւ դրա պատմության հանդեպ ատելությունը նորմ է դառնում»,- նշել են բանակի անանուն ներկայացուցիչները:

 

Զինվորականները նաեւ կարծիք են հայտնել, որ Ֆրանսիայում «քաղաքացիական պատերազմ է հասունանում»: «Գործեք, տիկնայք եւ պարոնայք: Խոսքը մեր եւ ձեր երկրի գոյատեւման մասին է»,- կոչի վերջում գրել են զինծառայողները:

 

Մոսկվայի ժամանակով 3.15-ի դրությամբ բաց նամակին աջակցել է շուրջ 45 հազար մարդ:

 

Ֆրանսիայի Զինված ուժերի շտաբի պետ Ֆրանսուա Լեկուանտրն ավելի վաղ Parisien պարբերականին հայտարարել էր, որ պահեստազորի գեներալները, ովքեր ստորագրել էին առաջին բաց նամակը, կարող են հեռացվել ծառայությունից:

 

Ապրիլին Valeurs actuelles-ում հայտնվել էր բարձրագույն կազմի 20 սպաների բաց նամակը, որում զինվորականները նախագահ Էմանուել Մակրոնին կոչ էին արել «պաշտպանել հայրենասիրությունը»: Ըստ զինվորականների՝ «կազմաքանդումը, որոշակի հակառասիզմի միջոցով, դրսեւորվում է մի նպատակով՝ Ֆրանսիայի ազգային տարածքում գտնվող համայնքների միջեւ դժվարություններ եւ ատելություն ստեղծելու համար»: Նրանք նշել էին, որ այսօր ոմանք խոսում են ռասիզմի, ապագաղութաբանական տեսությունների մասին, «սակայն այդ տերմիններում այդ ատելի եւ ֆանատիկ պաշտպանները ռասայական պատերազմ են ցանկանում»: «Ազգային ճակատ» կուսակցության ղեկավար Մարին Լը Պենը կողմ է հանդես եկել այս կոչին: