«Haqqin.az»-ը Լևոն Տեր-Պետրոսյանի՝ Արցախի տարածքները հանձնելու և Սերժ Սարգսյանի կողքին կանգնելու հայտարարության մասին (Տեսանյութ)

Ադրբեջանական «Haqqin.az» և «Minval.az» լրատվական կայքերն անդրադարձել են Լևոն Տեր-Պետրոսյանի երեկ «Կենտրոն» հեռուստաընկերության «Ուրվագիծ» հաղորդաշարին տված հարցազրույցին: 

Ադրբեջանական կայքերը, մասնավորապես, առանձնացրել են  առաջին նախագահի հետևյալ երկու մտքերը. առաջին՝ եթե դա չարվի կամավոր (Արցախի 7 շրջանների հանձնումը - խմբ.), ապա մի օր հողերը կվերցնեն սանկցիաների արդյունքում, և երկրորդ, որ սատարում է Սերժ Սարգսյանին ղարաբաղյան հակամարտության արագ լուծման հարցում. «Այո՛, մենք սատարում ենք, բայց միայն այս հարցում»:

Մեր կողմից ավելացնենք, որ «Haqqin.az»-ի խմբագրակազմն այնքան էլ լավ ծանոթ չէ Լևոն Տեր-Պետրոսյանի մոտեցումներին ղարաբաղյան հակամարտության վերաբերյալ, հակառակ դեպքում ամենօրյա ռեժիմով այս կայքում մեջբերումներ կարվեին թե Լևոն Տեր-Պետրոսյանի ելույթներից, թե նրա հոդվածներից: Նշենք նաև, որ թեպետ ադրբեջանական ԶԼՄ-ը զարմացած են այն հանգամանքից, որ առաջին նախագահը բացահայտորեն սատարում է Սերժ Սարգսյանին, ընդգծենք, որ Տեր-Պետրոսյանը դա անում է «նախանձելի պարբերականությամբ»՝ հայ-թուրքական «ֆուտբոլային» դիվանագիտության օրերին Տեր-Պետրոսյանը կոչ էր անում գործընթացը հասցնել մինչև վերջ՝ բացել հայ-թուրքական սահմանը, Հայաստանի արտաքին քաղաքական օրակարգից հանել Հայոց ցեղասպանության միջազգային ճանաչման հարցը և անել դա անգամ նախապայմանների պարագայում, որոնք կվերաբերվեն ղարաբաղյան հակամարտության հարցում հայկական կողմի միակողմանի զիջումներին:

Լևոն Տեր-Պետրոսյանը «պետականության շահերից» ելնելով 2015 թվականի փետրվարին Ծառուկյան-Սարգսյան հակամարտության ամենաթեժ պահին բաց նամակով «դիմեց» «հարգարժան Սերժ Ազատիչին»: Հետևաբար չարժե շատ զարմանալ, երբ այսօր ականատեսն ենք դառնում այն բանի, թե ինչպես է նա հրապարակայնորեն աջակցում Մարտի մեկի գնով իշխանության եկած Սերժ Սարգսյանին, և թե ինչպես է հեռուստաեթերում գովելով ՀՀԿ-ի ծրագիրը ղարաբաղյան հակամարտության կարգավորման հարցում քննադատում է Սերժ Սարգսյանի բոլոր քաղաքական հակառակորդներին:   

Zham.am