Սաուդացի լրագրողին սպանել են, մասնատել ու «չեզոքացրել» թթվային լուծույթի օգնությամբ. լրատվամիջոցների անդրադարձը լրագրողի անհետացմանը

Ստամբուլում Սաուդյան Արաբիայի հյուպատոսություն մուտք գործելուց հետո անհայտ կորած սաուդացի հայտնի ընդդիմադիր լրագրող, The Washington Post-ի թղթակից Ջամալ Խաաշկղիջիին կարող են ոչ միայն սպանած լինել, այլև չի բացառվում, որ հյուպատոսության սաուդացի աշխատակիցները մասնատել են նրա մարմինն ու «չեզոքացրել» թթվային լուծույթի օգնությամբ:

Ինչպես գրում է gazeta.ru-ն, որը հավաքել է ամերիկյան ու թուրքական մի շարք լրատվամիջոցների կարևոր անդրադարձերը կորած լրագրողի գործի շուրջ, նշում է, որ ըստ CNN հեռուստաալիքի տեղեկությունների՝ Սաուդյան Արաբիայի իշխանություններն այժմ զեկույց են պատրաստում, որում պատրաստվում են խոստովանել Խաաշկղիջիի մահվան փաստն ու պարզաբանել, որ տեղի ունեցածն «անհաջող հարցաքննության» արդյունք է:

Ըստ հեռուստաալիքի անանուն զրուցակիցներից մեկի՝ գործողությունն իրականացվել է առանց թույլտվության, և մեղավորները դրա համար պատասխանատվություն կկրեն:
Եվս մի աղբյուր նշել է, որ տվյալ զեկույցը կարող է որոշակի փոփոխությունների ենթարկվել:

Իսկ ահա The New York Times-ը հղում է արել բարձրաստիճան թուրք պաշտոնյաների, որոնք պնդում են, որ լրագրողին սպանել են հյուպատոսության շենքի ներսում, իսկ հետո մարմինը մասնատել ու մաս-մաս դուրս բերել տարածքից:

The Washington Post-ը նշում է, որ իրենց լրագրողն անձնական հաշիվներ է ունեցել Սաուդյան Արաբիայի գահաժառանգ արքայազն Մուհամեդ բեն Սալմանի հետ, որը փորձել է տեղափոխել ընդդիմադիր լրագրողին Սաուդյան Արաբիա ու այնտեղ ձերբակալել:

Թուրքական Sabah պարբերականը հայտնել է, որ թուրքական ոստիկանությանը զգալի օգնել են Խաաշկղիջիի ձեռքին եղած Apple «խելացի» ժամացույցի ձայնագրած ու պահպանած ֆայլերը, որոնց մի մասը, սակայն, ջնջվել է, քանի որ լրագրողին տանջամահ անողներն ընթացքում նկատել են ժամացույցն ու փորձել ջնջել ֆայլերի մի մասը:

Աղբյուրը՝ Tert.am