Լևոն Տեր-Պետրոսյանն իր քաղաքական փառահեղ կարիերայի ընթացքում երկու անգամ փախուստի շատ լավ օրինակ է ցույց տվել. Նիկոլ Փաշինյան

Լևոն Տեր-Պետրոսյանն ասում է՝ կազմակերպենք, վարչապետը գնա երկրից: Լևոն Տեր-Պետրոսյանն իր կարիերայի ընթացքում երկու անգամ փախուստի լավ օրինակ է ցույց տվել: Այսօր այս մասին Արագածոտնի մարզում նշեց ՀՀ վարչապետ Նիկոլ Փաշինյանը՝ խոսելով առաջին նախագահի առաջարկի մասին:

«Ես նմա՞ն եմ մարդու, որը կարող է փախնել։ Եթե իմ ժողովուրդը պետք է որոշի, որ ինձ գնդակահարելու է, ես խոնարհ կանգնելու եմ էդ գնդակահարության պատի տակ։ Որևէ մեկը չմտածի, թե ժողովրդի կայացրած որևէ որոշումից կփախնեմ։ Եվ դուք ունեք էդ իրավունքը, ժողովո՛ւրդ։ Փախնողները թող մտածեն փախնելու մասին»,- ասել է Փաշինյանը:

Փաշինյանը նշել է՝ պետք է ապրենք այս տարածաշրջանում, բայց այստեղ ապրելու ամենամեծ խնդիրն այն է, որ մեզ ընկալում են որպես թշնամի և մենք ընկալում ենք որպես թշնամի։ «Ինչքան մենք ընկալում ենք որպես թշնամի, էնքան մեզ ընկալում են որպես թշնամի։ Եվ նույնիսկ շատ դժվար է գտնել էն մեկնարկային կետը, որից էս պրոցեսը սկսվել է»,- ասել է Փաշինյանը:

Հիշեցնենք, որ ՀՀ առաջին նախագահ Լևոն Տեր-Պետրոսյանը որպես լուծման տարբերակ առաջարկել էր, որ Փաշինյանն անվտանգության երաշխիքներով ապաստան ստանա արտերկրում, ինչից հետո անցկացվեն արտահերթ խորհրդարանական ընտրություններ:

Աղբյուր՝ Tert.am