Թաթուլ Կրպեյանի անվան զբոսայգում հանդիսավորությամբ բացվել է Հայաստանի ազգային հերոսի կիսանդրին

Երևանի քաղաքապետ Տարոն Մարգարյանը ՀՀ պաշտպանության նախարար Վիգեն Սարգսյանի, պաշտոնատար այլ անձանց, Հայաստանի ազգային հերոս Թաթուլ Կրպեյանի ընտանիքի անդամների ու հարազատների, Թաթուլի զինակից ընկերների ու բազմաթիվ բնակիչների հետ միասին ներկա է գտնվել Հայաստանի ազգային հերոսի կիսանդրու բացման հանդիսավոր արարողությանը: Մինչ այդ ներկաները նախ հարգանքի տուրք են մատուցել Հայոց ազատամարտի նահատակների հիշատակին, ծաղիկներ խոնարհել այգում ամփոփված ազատամարտիկների շիրիմներին:
Կիսանդրու բացման հանդիսավոր արարողության շրջանակում ելույթ ունեցողներն առանձնակի կարևորել են նմանատիպ նախաձեռնությունների կյանքի կոչման անհրաժեշտությունը՝ հատկանշելով, որ դա ոչ միայն հարգանքի տուրք է Հայրենիքի համար իրենց կյանքը նվիրաբերած հայորդիների հիշատակին, այլ նաև մատաղ սերնդի մեջ հայրենասիրության յուրովի սերմանում ու հերոսության դաստիարակում է:
Հայաստանի ազգային հերոս Թաթուլ Կրպեյանի կիսանդրու հանդիսավոր բացման արարողությունից հետո ՀՀ ԶՈՒ հոգևոր առաջնորդ Վրթանես եպիսկոպոս Աբրահամյանի կողմից տեղում մատուցվել է հոգեհանգստի կարգ՝ հայ ազգային ազատագրական պայքարի նվիրյալ բոլոր նահատակների հոգիների հանգստության համար:
Ներկաները ծաղիկներ են խոնարհել Թաթուլ Կրպեյանի կիսանդրու պատվանդանին, հարգանքի տուրք մատուցել Հայաստանի ազգային հերոսի հիշատակին:
Հարկ է նշել, որ կիսանդրու հեղինակը ՀՀ ժողովրդական նկարիչ, քանդակագործ Լևոն Թոքմաջյանն է: