Եթե իշխանության չլինենք ու չկարողանամ ինձ աշխատաքնով ապահովել, կարող է արտագաղթեմ․ Հովիկ Աղազարյան. Տեսանյութ

Նիկոլ Փաշինյան-Գագիկ Ծառուկյան հանդիպումից, ապա Փաշինյանի՝ արտահերթ ընտրություններ նշանակելու մասին գրառումից րոպեներ անց՝ 168.am-ը Հանրապետության հրապարակին հարակից այգում  նկատեց Ազգային ժողովի «Իմ քայլը» խմբակցության պատգամավոր Հովիկ Աղազարյանին: Պարզվեց՝  Աղազարյանը սպասում էր իր ետևից եկող մեքենային, առիթից օգտվելով՝  մի քանի հարց ուղղեցինք, մասնավորապես՝ իշխանական պատգամավորների հետ քննարկե՞լ են արտահերթ խորհրդարանական ընտրութուններ անցկացնելու, ինչպես նաև ընտրության օրը որոշելու հարցը․

«Իհարկե խորհրդակցություն եղել է, բայց ոչ թե՝ կոնկրետ հունիսի 20-ին, որովհետև մենք բազմիցս հայտարարել ենք, որ արտահերթ խորհրդարանական ընտրությունները պետք է անցկացվեն խորհրդարանում ներկայացված ընդդիմադիր խմբակցությունների հետ՝ հնարավոր համաձայնության գալուց հետո տարբեր հարցերի շուրջ»։

Պատգամավորն ասաց, որ ընդդիմադիր խմբակցությունների հետ տարբեր հարցերի շուրջ համաձայնության գալու գործընթացում է եղել այս պայմանավորվածությունը, հետևաբար՝ նորմալ է, որ արտահերթ ընտրությունների օրը նշանակելու մասին իրենք նախքան Փաշինյանի գրառումը չեն տեղեկացվել։

Պատգամավորից հետաքրքրվեցինք նաև, թե ինչպե՞ս է պատկերացնում քարոզարշավին Նիկոլ Փաշինյանի մասնակցությունը, երբ նա անգամ Երևանում չի կարողանում ազատ տեղաշարժվել՝ կառավարական մի մասնաշենքից մյուսը գնալու համար ոստիկանական զորք է կուտակում։

«Նիկոլ Փաշինյանը քարոզարշավին կմասնակցի համապատասխան միջոցառումների ձեռնարկմամբ, այսինքն՝ պետական պահպանության ծառայությունը կամ Ազգային անվտանգության համապատասխան ծառայությունը պետք է ապահովի վարչապետի և բարձրաստիճան պաշտոնյաների անվտանգությունը, և ոչ մի տարօրինակ բան չկա այդտեղ, որ մի քիչ ավելի ուժեր են կուտակվում պաշտպանելու համար, որովհետև մենք վկա ենք վերջին ժամանակների նաև կոչերին՝ ներքաղաքական ընդդիմադիր գործընկերների կողմից՝ ընդհուպ մինչև ֆիզիկական հաշվեհարդար»,- ասաց Աղազարյանը։

Հարցին՝ այսինքն՝ վա՞խ կա իշխանությունների մոտ, որ քարոզարշավն էլ պետք է մեծաթիվ ոստիկանական ուժերի ուղեկցությամբ անեն, իմքայլական պատգամավորը պատասխանեց, որ վախ չկա, կա անհանգստություն․

«Մենք նաև գիտենք հոկտեմբերի 27-ի մասին, հետևաբար՝ լրացուցիչ ուժերով անվտանգություն ապահովելով՝ ոչ մի սարսափելի բան տեղի չի ունենա, և այդ միջոցառումների կիրառմամբ էլ կանցկացվի նաև քարոզարշավը»։

Հարցին՝ նորմա՞լ եք համարում թեկուզ հեռավոր գյուղերում քարոզարշավի համար մի քանի ավտոբուսով զորքի տեղափոխումը, որոնք պետք է ապահովեն Փաշինյանի անվտանգությունը, Հովիկ Աղազարյանը զարմանալի պատասխան տվեց․

«Պարտադիր չէ, որ վարչապետը գնա հեռավոր գյուղերը, հեռավոր գյուղերը կգնանք մենք»։

Իշխանական պատգամավորից հետաքրքրվեցինք, թե ինքը չունի՞ այդ անհանգստությունը․

«Ես չունեմ այդ անհանգստությունը, այսինքն՝ ոչ թե չունեմ այդ անհանգստությունը, հնարավոր է ամեն ինչ էլ, բայց դե, եթե այդպես մտածենք՝ չենք կարող մենք մեր վրա վերցրած պարտականությունները կատարենք։ Մյուս կողմից՝ ուրիշ բան է պատգամավորի անվտանգության ապահովության հարցը, այլ բան է՝ վարչապետի անվտանգության ապահովության հարցը»։

Հովիկ Աղազարյանից հետաքրքրվեցինք, թե ինքն ի՞նչ ակնկալիքներ ունի այս ընտրություններից․

«Ընտրությունները միշտ անկանխատեսելի են, դժվար է կանխատեսել, որովհետև բոլոր դեպքերում իմ կարծիքը կլինի սուբյեկտիվ, իմ գնահատականը կլինի սուբյեկտիվ։ Ես ակնկալում եմ, որ մեր թիմը հնարավորություն կունենա 50 տոկոսից մի փոքր ավելի ձայն ապահվել։ Անկումն ապահովված է մի քանի հանգամանքներով՝ 1-ին հանգամանքը, որ մենք 2018 թվականին հավաքեցինք այդքան տոկոս ձայն՝ 70 քանի տոկոս, դրա մի մասը, չեմ կարող ասել՝ ինչքանը, պայմանավորված էր նաև ժողովրդի մոտ այն էյֆորիկ դրական լիցքերով, վիճակով, 2-րդ՝ անկախ ամեն ինչից՝ իշխող քաղաքական ուժը միշտ էլ դժվարանում է իր ծրագրային դրույթներն ամբողջությամբ կյանքի կոչել, և 3-րդը՝ պայմանավորված կորոնավիրուսով և պատերազմում արձանագրված ցավալի իրողություններով, որովհետև շատերի մոտ կարծիք կա, թե իշխանությունները չեն ձեռնարկել անհրաժեշտ միջոցառումները՝ այդ խնդիրների լուծման համար։ Այդ ամենով պայմանավորված՝ այդ անկումը սպասելի է»։

Հարցին, թե ինչպե՞ս է եկել այն եզրահանգման, որ հենց 50 տոկոս և ավելի քվե կվաստակեն, «Իմ քայլ»-ի պատգամավորը նշեց, որ պարբերաբար հանդիպում են քաղաքացիների հետ, և այդ շփումների արդյունքում են եկել նման եզրահանգման։

Մեր դիտարկմանը, թե կարծիքներ են հնչում, որ այս իշխանություններն այնքան ապօրինություններ են գործել, որ իշխանափոխությունից հետո ներկայիս իշխանությունները փախուստի են դիմելու, Հովիկ Աղազարյանն ասաց, որ նախ պետք է ներկայանան ժողովրդի դատին, որից հետո նոր միայն պարզ կլինի, թե ինչ տեղի կունենա։

Այդուամենայնիվ, եթե  իրենք այլևս իշխանություն չլինեն, ինքը կհեռանա՞ երկրից, թե՞ կշարունակի ապրել Հայաստանում, հարցրեցինք իմքայլական պատգամավորին.

«Հեռանալը գիտեք՝ ոնց, եթե աշխատանք չունենամ՝ ֆիզիկական գոյության իմաստով, որովհետև ես մի 100 անգամ արդեն պատգամավոր եմ դառել, ոչ բիզնես ունենք, ոչ եսիմ ինչ ունենք, կներեք, նույնիսկ բնակարան էլ չունենք։ Հետևաբար, եթե ես չկարողանամ աշխատանքով ինձ ապահովել և իմ ընտանիքին ապահովել, կարող է և՝ արտագաղթեմ մի որոշ ժամանակ, ինչպես եղել է  արդեն իմ կյանքում, մի տասը տարով ես գտնվել եմ Ռուսաստանի Դաշնությունում և հոգացել եմ իմ ընտանիքի ծախսերը, ինչպես շատ մեր հայրենակիցներ, բայց ես հուսով եմ, որ մենք կարժանանանք մեր ժողովրդի վստահությանը և այնպես կանենք, որ այդ արտագաղթումը լինի շատ փոքր»։

Մանրամասները՝ 168.am-ի տեսանյութում