Նիկոլ Փաշինյանը հրաժարական է տալու ապրիլի 20- 30-ն ընկած ժամանակահատվածում. սահմանադրագետ

Հաշվի առնելով արտահերթ ընտրությունների ժամկետի վերաբերյալ Նիկոլ Փաշինյանի հայտարարությունը, կարելի է ենթադրել, որ վերջինս պատրաստվում է ապրիլի 20-30–ն ընկած ժամանակահատվածում հրաժարական ներկայացնել: Այս մասին Tert.am-ի հետ զրույցում հայտնել է սահմանադրագետ Գոհար Մելոյանը:

Մելոյանը նշել է՝ ենթադրվում է, որ Նիկոլ Փաշինյանը երաշխիք է ստացել Գագիկ Ծառուկյանից, որ ԲՀԿ-ն թեկնածու չի առաջադրելու իր հրաժարականի պարագայում՝ հաշվի առնելով այն հանգամանքը, որ Փաշինյանը հայտարարությունն արել է ԲՀԿ առաջնորդի հետ հանդիպումից հետո: Ըստ նրա՝ Սահմանադրությունը հնարավորություն է տալիս վարչապետի հրաժարականի պարագայում խմբակցությունների կողմից նոր վարչապետի թեկնածության առաջադրումը:

Գոհար Մելոյանի խոսքով՝ Նիկոլ Փաշինյանը հրաժարական է տալու այս տարվա ապրիլի վերջին տասնօրյակում՝ ապրիլի 20-ից մինչև 30-ն ընկած ժամանակահատվածում, ինչից հետո 7 օր պետք է վարչապետ չընտրվի:

«Երկրորդ անգամ թեկնածու չառաջադրելու և նոր վարչապետ չընտրվելու պարագայում 7 օր անց օրենքի ուժով խորհրդարանն արձակվում է, ինչից ոչ ուշ, քան 30 օր անց և ոչ շուտ, քան 45 օր հետո նշանակվում են արտահերթ խորհրդարանական ընտրություններ»,-ասաց սահմանադրագետը: