Երեկ պաշտպանության նախարարը ստորագրել է հրաման, որով Տիրան Խաչատրյանն այժմ գտնվում է կադրերի ռեզերվում, պետք է չգնա աշխատանքի և հանձնի մեքենան. Ա. Քոչարյան

Գևորգ Կոստանյանի մասով առաջին անգամ եմ լսում և որևէ մեկնաբանություն չեմ կարող տալ մինչև չծանոթանամ՝ ինչի մասին է խոսքը: Այս մասին այսօր ճեպազրույցի ժամանակ ասաց «Իմ քայլը» խմբակցության պատգամավոր Անդրանիկ Քոչարյանը՝ պատասխանելով դիտարկմանը, թե Թագուհի Թովմասյան քիչ առաջ նշել է, որ միջազգային Ինտերպոլը դեռևս մեկ տարի առաջ հրաժարվել է «Մարտի մեկ»-ի գործով Գևորգ Կոստանյանին հետախուզել՝ համարելով այն քաղաքական՝ միաժամանակ հրաժարվելով աշխատել ՀՀ-ի հետ: Փոխանցում է  Tert.am-ը:

«Ես ուզում եմ օր առաջ Գևորգ Կոստանյանը վերադառնա հայրենիք և պատասխանի նախաքննական մարմնի հարցերին, Սասուն Խաչատրյանը բաց ձեռքերով կընդունի նրան: Գևորգ Կոստանյանը այն պաշտոնյան է եղել, որին հարցեր, կարծում եմ, պետք է լինի հատկապես փամփուշտների փոխման մասով»,- նշեց նա:

Հարցին՝ ինչպե՞ս եք վերաբերում այն փաստին, որ Նիկոլ Փաշինյանը առաջարկել է նախագահին՝ Արտակ Դավթյանին նշանակել ՀՀ ԶՈՒ ԳՇ պետ, Քոչարյանը պատասխանեց. «Այս պահին վարչապետը ներկայացրել է  ԶՈՒ ԳՇ պետի թեկնածու, որն ունի ԳՇ կառավարման փորձ, եղել է օպերատիվ վարչության պետ, որն ամենակարևոր վարչությունն է, եթե նայենք այսօրվա ԳՇ կադրային շտաբի պոտենցիալը, պետի տեղակալը ազատված է պաշտոնից, Մակարյանի հետ խնդիրներ կան, Ստեփան Գալստյանը, որն այդ հայտնի ցուցակի մեջ ընդգրկված էր, պարտականությունները դրված են նրա վրա և վարչապետը կատարել է տրամաբանական որոշում»:

Լրագրողի դիտարկմանը, թե Քոչարյանն ամիսներ առաջ ճեպազրույցի ժամանակ  նշել է, որ Արտակ Դավթյանը վատ դերակատարություն է ունեցել Ապրիլյան պատերազմի ընթացքում, արդյո՞ք իր տեսակետը փոխվել է, Անդրանիկ Քոչարյանը պատասխանեց.  

«Իմ դիրքրոոշումը մնացել է նույնը. ՀՀ ԶՈՒ ԳՇ պետի պաշտոնը չի կարող կես ժամից ավել թափուր մնալ և ես չեմ կարծում, որ ՀՀ նախագահը ճիշտ որոշում կայացրեց, որ առարկություններով հետ ուղարկեց, այստեղ ոչ թե աշխատանքից ազատման, այլ ԳՇ պետին պաշտոնի նշանակմանն է վերաբերում»:

Tert.am-ի հարցին, թե պաշտպանության հանձնաժողովի ընթացում նա խոսել է տելեգրամյան ալիքների մասին, «Դեժավյու» տելեգրամյան ալիքով իր հրետանավոր որդուն առնչվող տեղեկատվություն կար, մասնավորապես նշվում էր, որ դրա պատճառով է, որ Դավիթ Տոնոյանի հետ իր հարաբերությունները լարվել են, Քոչարյանը պատասխանեց՝ իր որդին 44 օր պատերազմ է անցել, պատերազմի ամենաթեժ կետերով՝ 17 օր Ֆիզուլիում է եղել և Շուշիով ավարտել:

Պատասխանելով հարցին, թե ինչու է Լևոն Տեր-Պետրոսյանը համարում, որ իրենց կազմակերպած արտահերթ ընտրությունները արդար չեն լինելու, Քոչարյանը պատասխանեց. «Որտեղի՞ց վստահություն, որ ընտրությունները լինելու են վատը, այդ ինչ կանխատեսումներ են, ես կուզեի ՀՀ նախագահը վերլուծեր բոլոր ընտրությունները, նաև իր հրաժարականի բուն պատճառները, ոչ թե առաջնային մանդատով լեգիտիմությամբ օժտված իշխանություններին գրողի ծոցը ուղարկեու առաջարկով հանդես գալ»:

Լրագրողը հետաքրքրվեց՝ ԳՇ պետի տեղակալ Տիրան Խաչատրյանը գնում է աշխատանքի, թե ոչ, Քոչարյանը նշեց, որ ընթացակարգով նախագահի հրամանից հետո ՊՆ նախարարը պետք է որոշի նրա կարգավիճակը. «Ինչքան գիտեմ՝ երեկ պաշտպանության նախարարը հրաման է ստորագրել, որով Տիրան Խաչատրյանը գտնվում է կադրերի ռեզերվում և նա պետք է աշխատանքի չգնա և մեքենան հանձնի»:

Աղբյուր՝  Tert.am