Ինչու՞ են Էրդողանի ու Տեր-Պետրոսյանի տեսակետները Փաշինյանի մասով նույնական, իսկ Ալիևինը` ոչ

Եթե ուշադրությամբ հետևենք Հայաստանի ներքաղաքական զարգացումներին ու դրա արձագանքներին դրսից, ապա կտեսնենք, որ հայաստանյան ներքաղաքական գործընթացների վերբերյալ Թուրքիայի նախագահ Ռեջեփ Թայիփ Էրդողանի, Նիկոլ Փաշինյանի ու Լևոն Տեր-Պետրոսյանի գնահատականները գրեթե նույնն են: Նրանք երեքն էլ ցանկանում են, որ Հայաստանի այսօրվա «status quo»-ն պահպանվի, իսկ պատերազմի գլխավոր մեղավորներ հռչակվեն Հայաստանի նախկին իշխանություններն ու բանակը: Ուշադրություն դարձնենք այն հանգամանքի վրա, որ Հայաստանի հանդեպ դրական դիրքորոշում ունեցող երկրները` Ռուսաստանը, Իրանը, Ֆրանսիան, Հունաստանը, չհայտարարեցին Հայաստանում ռազմական հեղաշրջման վտանգի մասին: Փաստացի ստացվում է, որ Նիկոլ Փաշինյանի ու Լևոն Տեր-Պետորսյանի դիրքորոշումները բացառապես համընկնում են Հայաստանի թշնամի Թուրքիայի տեսակետների հետ: Բայց ամենահետաքրքիրն այն է, որ այս անգամ այդ շարքին չմիացավ Ադրբեջանի նախագահ Իլհամ Ալիևը: Հենց դրա պատճառով էլ Տեր-Պետրոսյանն ու Փաշինյանը խիստ նյարդայնացած են, չէ՞ որ նրանք բավարարել են Ադրբեջանի գրեթե բոլոր պահանջները, չստանալով ոչինչ: Իսկ ինչո՞վ է պայմանավորված Ալիևի նման դիրքորոշումը, շատ հասկանալի է:

Ունենալով սեփական երկրի պատմության մեջ Էլչիբեյի փորձը, Իլհամ Ալիևը շատ լավ հասկանում է, որ Փաշինյանը Հայաստանում քաղաքական ապագա չունի: Եվ այդ իսկ պատճառով էլ նա հույս չունի ուղղակի կամ անուղղակի ձևով աջակցել Փաշինյանին` Հայաստանում պահել իշխանությունը: Ի տարբերություն Թուրքիայի, որը Հայաստանում ձևավորել է լայն գործակալական ցանց և փորձելու է մինչև վերջ աջակցել Փաշինյանին` իշխանությունը պահելու համար: Այսինքն, Իլհամ Ալիևը հայ ժողովրդի մասին ավելի լավ է մտածում, քան Թուրքիան:

Ալիևը սպասում է, որ Հայաստանում ձևավորվի նոր իշխանություն, որպեսզի նրա հետ էլ կյանքի կոչի նոյեմբերի 9-ի ու հունվարի 11-ի պայմանավորվածությունները: Ալիևը փաստացի համարում է, որ ստացել է Հայաստանից ամեն ինչ, և փորձում է պահպանել ներկայիս «status quo»-ն, համարելով, որ Փաշինյանն այլևս չի կարող պահել իր իշխանությունը և հույս ունենալով, որ Ռուսաստանի հետ միասին Հայաստանի նոր իշխանության հետ համաձայնության կգա:

Թուրքիայի դիրքորոշումն այդպիսին չէ: Թուրքերը համոզված են, որ Փաշինյանի պարագայում դեռ կարող են նոր զիջումներ ստանալ, քանզի ունեն լայն գործակալական ցանց Հայաստանի քաղաքական ու հանրային դաշտում, և զարմացած են, թե ինչպես էին նախկին իշխանությունները հանդուրժում այս ամենը:

Այդ իսկ պատճառով էլ Էրդողանը փորձում է ամեն ինչ անել, որ Փաշինյանի իշխանությունը պահպանվի, քանզի նա դեռ լուրջ ծրագրեր ունի Սյունիքի վերաբերյալ:

Ահա թե ինչու այս ճակատագրական պահին ի օգուտ Փաշինյանի հայտարարությամբ հանդես եկավ ՀՀ առաջին նախագահը:

Սա՛ է իրականություն:

Արտակ Հակոբյան: