Ես առաջարկել եմ ռուսներին` «Իսկանդերը» հետ վերցնել հայերի ձեռքից․ Իլհամ Ալիև. Տեսանյութ

Ադրբեջանի նախագահ Իլհամ Ալիևը օրերս մամուլի ասուլիս է հրավիրել` միջազգային լրատվամիջոցների մասնակցությամբ, և անդրադարձել Հայաստանի ղեկավարի պահվածքին, նրա արած հայտարարություններին, այդ թվում՝ «Իսկանդերի» չկրակելու կամ 10 տոկոսով պայթելու հետ կապված։

«Ինչ վերաբերում է Հայաստանի վարչապետի հայտարարությանը՝ կապված «Իսկանդեր» հրթիռային համալիրի հետ, այն մեզ մոտ նույնպես հարցեր է առաջացրել, ես չէի ցանկանա հեգնել այս թեմայով, արդեն բավարար մեկնաբանություններ կան և՛ ռուսական պաշտոնական շրջանակներից, և՛ ՌԴ պառլամենտականների կողմից, և՛ փորձագետների կողմից այն մասին, որ «Իսկանդերի» հրթիռը 10 տոկոսով պայթեցնելու համար պետք է «մեծ ջանք» գործադրել»,-ասուլիսի ժամանակ ծիծաղը մի կերպ զսպելով՝ հեգնում է Ալիևը Փաշինյանին։

Ապա շարունակում է, որ իրենք չեն տեսել «Իսկանդերի» հրթիռի արձակումը, և սա, ըստ Ալիևի, Փաշինյանի կողմից հերթական «վրիպակն» էր, և այսպիսի սխալներ շատ են թույլ տրվել նրա կողմից հրապարակավ։ 

«Սկզբունքորեն, այն, ինչ տեղի է ունենում այսօր Հայաստանում, տրագիկոմեդիա է հիշեցնում, ես այդպես կբնութագրեի իրավիճակը։ Պատկերացրեք՝ նրանց մոտ անհետանում է ինքնաթիռ, և նրանք չգիտեն՝ ուր է այդ օդանավը։ Հետո, Աբու Դաբիում ռազմարդյունաբերության ցուցահանդեսին հայկական տաղավարը դատարկ էր, չկար որևէ ցուցանմուշ, մի կողմից՝ ի՞նչ ցուցադրեն, իրենք ռազմական արդյունաբերություն չունեն, մյուս կողմից՝ ինչո՞ւ են «կապիկություն» անում, ուրիշների հետևից կրկնում, եթե հայկական տաղավարում ինչ-որ գրքույկներ էին։ Խայտառակվեցին աշխարհով մեկ։ Այնուհետև եղավ հայտարարություն, որ «Իսկանդերը» կրակվել է, իսկ ո՞ւր է բաց թողնվել, և պայթել է 10 տոկոսով․ անեկդոտ»,-շարունակում է ծաղրել Ալիևը։

Նա նաև անդրադառնում է նրան, որ ինքը ռուսներին դեռ «Իսկանդերի» գործարքի ժամանակ է ասել, որ սխալ է այդ զենքը հայերին փոխանցելը, որ «Իսկանդերն» իրենց որևիցե կերպ չի զսպի, ու նաև պատերազմի ժամանակ է առաջարկել ռուսական կողմին` հետ վերցնել «Իսկանդերը» հայերի ձեռքից և այլևս հայերին անվճար զենք չտրամադրել։