Թուրքիայի ԱԳՆ–ն փաստացի հայտարարեց, որ Նիկոլն իրենցն է, Նիկոլին ասում ենք՝ ոչ. Անդրանիկ Թևանյան. Տեսանյութ

Մեր բանակը պատերազմի ժամանակ ունեցել է 4 թշնամի՝ Ադրբեջանը, Թուրքիան, Սիրիայից եկած վարձկանները և ամենանենգ թշնամին՝ Հայաստանի թիկունքից գործող թուրքական հինգերորդ շարասյունը: Դրա համար բոլորս Նիկոլին ասում ենք՝ ոչ: Այս մասին այսօր Նիկոլ Փաշինյանի հրաժարականի պահանջով հավաքի ժամանակ ասաց «Հայրենիքի փրկության շարժման» խորհրդի անդամ Անդրանիկ Թևանյանը: Հաղորդում է Tert.am-ը: 

Անդրանիկ Թևանյանը հանրությանը կոչ արեց հավաքվել Բաղրամյան պողոտայում և այդտեղից չհեռանալ այնքան, մինչև իր որակմամբ՝ թուրքի առաջ ծնկած Նիկոլը չվռնդվի Կառավարության շենքից: Ըստ նրա՝ այսօր Թուրքիայի արտաքին գործերի նախարարությունը վերջնական կնիք դրեց Փաշինյանի վրա՝ նրան աջակցելով և սպառնալով մեր Զինված ուժերին:

«Թուրքիայի Արտաքին գործերի նախարարությունը փաստացի հայտարարեց, որ Նիկոլն իրենցն է: Ադրբեջանի ու Թուրքիայի խնդիրը շատ պարզ է, նրանք ֆինանսական և այլ աջակցություն են ցուցաբերում Նիկոլ Փաշինյանի իշխանությանը»,- ասաց նա և հավելեց, որ սրա վառ ապացույցն այն է, որ Նիկոլ Փաշինյանն իր վերջին հարցազրույցի ժամանակ ռուսական զենքը որակեց որպես անորակ զենք:

Նա նշեց, որ Բաղրամյան պողոտայում են մնալու այնքան ժամանակ, մինչև այս իշխանությունը դուրս չգա Կառավարության շենքից: Նա հիշեցրեց, որ Նիկոլ Փաշինյանը հայտարարել է՝ դադարեցնում է թավիշը, քաղաքական ձերբակալությունների է գնալու: «Ես 2018 թվականից ասում էի, որ Նիկոլը պատերազմ է սադրում, թուրքերի հետ պայմանավորված պատերազմ է անելու, որ տապալում է բանակցությունների գործընթացը, որ Նիկոլը կապիտուլյացիայի է տանելու Արցախը և Հայաստանը, ցավոք, իմ կանխատեսումները իրականություն դարձան»:

Ըստ նրա՝ պատահական չէ, որ Թուրքիան անհանգստանում է և պաշտպանում է Նիկոլ Փաշինյանին։

Աղբյուր՝ Tert.am