Ամեն ինչ պետք է կանխատեսել ամենաչնչին մանրամասներով՝ հաշվի առնելով նաև Հայաստանի փորձը. Լուկաշենկոն` արտաքին ուժերի կողմից Բելառուսն ապակայունացնելու փորձերի մասին

Արտաքին ուժերը փորձում են ապակայունացնել իրավիճակը Բելառուսում: Այս մասին այսօր, փետրվարի 25-ին հայտարարել է Բելառուսի նախագահ Ալեքսանդր Լուկաշենկոն` երկրի անվտանգության խորհրդի պետքարտուղար Ալեքսանդր Վոլֆովիչի հետ հանդիպման ժամանակ, հաղորդում է Tert.am-ը EAdaily-ին հղելով:

Լուկաշենկոյի խոսքերով, ընթացիկ դժվար տարում Բելառուսի ներսում կայունության և անվտանգության ապահովումը ամենակարևոր հարցն է:

«Մենք դա երբեք չենք թաքցրել: Ես այդ մասին անընդհատ խոսել եմ: Շատ դժվար տարի է լինելու: Եվ ոչ միայն այն պատճառով, որ հասարակության մեջ առկա է որոշակի թյուրըմբռնում Բելառուսի զարգացման գործընթացների վերաբերյալ, այլ նաև այն պատճառով, որ Բելառուսի որոշ ներքին ուժերի և հատկապես արտաքին ուժերի մոտ իրավիճակն ապակայունացնելու ցանկություն կա: Չլինեին արտաքին ուժերը, չէին լինի նման ճնշումներ: Ընդ որում, բոլոր ուղղություններով: Այսօր մեզ արդեն մեղադրում են սպորտի ոլորտում: Նրանք փորձում են ղեկավարել և վերահսկել մեզ: Խախտելով բոլոր կանոնները և այլն, և այլն: Բայց մենք կլուծենք դա: Դա խնդիր չէ: Բայց տեսնում եք, որ քիչ-քիչ ուզում են ցնցել Բելառուսը: Եվ ազդանշանները, և ոչ միայն ազդանշանները, դրանք կոնկրետ գործողություններ են, գալիս են դրսից», -ասել է Լուկաշենկոն:

Բելառուսի ղեկավարը նշել է, որ «բարեբախտաբար, իրենք գտել ենք այդ բոլոր կենտրոնները»:

«Գիտենք բոլոր այդ «զմագարներին» (ընդդիմադիր ակտիվիստներ) և Բելառուսից  փախածներին: Բայց իմանալը բավարար չէ: Դրան պետք է դիմադրել: Ինչպե՞ս ենք գործելու իրավիճակի սրման դեպքում. ամեն ինչ պետք է կանխատեսել ամենաչնչին մանրամասներով՝ հաշվի առնելով Բելառուսի, Ռուսաստանի, Հայաստանի, Ղրղզստանի, Ուկրաինայի (տեսնում եք, որ Ուկրաինան բռնկվել է կրկին), և այլ հետխորհրդային հանրապետությունների փորձը: Մենք սրա շուրջ վաղուց ենք պայմանավորվել, և կարծում եմ, որ դուք արդեն պատրաստ եք դրան»,-հավելել է Լուկաշենկոն:

Tert.am