Փաշինյանն իր «Իսկանդերյան» պատասխանով հերթական անգամ վտանգեց հայկական պետականությունը

Նիկոլ Փաշիանի երեկվա հարցազրույցի հիմնական թեզերից մեկն այն էր, որ Հայաստանին մատակարարված «Իսկանդերները» հնամաշ էին և չաշխատող: Իր այս պատասխանով Նիկոլ Փաշինյանը փորձեց թիրախավորել Սերժ Սարգսյանին, բայց իրականում նա Ռուսաստանին թիրախավորեց, քանի որ մինչ օրս աշխարհում կա դիսկուրս ռուսական զենքի որակի, այդ թվում  «Իսկանդերի» որակի մասին:

Գաղտնիք չէ, որ զենքի շուկայում նոր «տարածքներ» գրավելու համար Ռուսաստանի և Արևմտյան երկրների միջև կա կատաղի մրցակցություն, իսկ տարածաշրջանային պատերազմները յուրօրինակ պոլիգոններ են տարբեր զենքերի ցուցադրման համար:

Օրինակ՝ վերջին ղարաբաղյան պատերազմից հետո զենքի համաշխարհային շուկայում թուրքական Bayraktar-ների «ակտիվները» կտրուկ բարձրացան: «Իսկանդերի» մասին Փաշինյանի երեկվա խոսքերը լուրջ հարված էին ռուսական շահերին: Դա նաև իմիջային հարված էր Ռուսաստանին՝ մի պետության ղեկավարի կողմից, որը համարվում է Ռուսաստանի Դաշնության ռազմավարական գործընկերը:

Փաշինյանն՝ իշխանության գալով փողոցից, այդպես էլ «գավառական լրագրողից» չվերածվեց պետական ​​գործչի: Նա դեռ չի գիտակցել, որ միջանձնային վեճերի, «ռազբորկաների» մեջ չի կարելի ոտնահարել այլ պետությունների շահերը:

Նույնը նա արեց 2018-ին, երբ Ռոբերտ Քոչարյանի նկատմամբ հետապնդումների պատճառով քրեական գործ հարուցեց ՀԱՊԿ-ի այն ժամանակվա քարտուղար Յուրի Խաչատուրովի դեմ: Նա չհասկացավ, որ այս քայլով  լուրջ հարված հասցրեց Ռուսաստանի իմիջին:

Հայ ժողովուրդն այս ամենի պատասխանը տեսավ 2020-ի պատերազմի ժամանակ: Արդյունքում մենք կորցրեցինք Ղարաբաղի տարածքի մեծ մասը, զոհվեցին մոտ 5000 մարդ... Բայց  ինչպես պարզվում է Փաշինյանն այս ամենից ոչ մի հետեւություն չի արել: Նրա գավառական էությունը թույլ չի տալիս փոխել սեփական գիտակցությունը:

Երբ 2018-ին Նիկոլը պատասխանում էր Սերգեյ Լավրովին և հայտարարում, որ «Ռուսաստանը պետք է հարմարվի հայկական իրողություններին», նա չհասկացավ, որ դա կհանգեցնի Ղարաբաղի տարածքների կորստին և շուրջ 5000 մարդու կյանք կարժենա,  բայց նույնիսկ պատերազմի նման արդյունքները չեն կարողանում փոխել Փաշինյանին:

Ինչպես ասում են՝  «Կարմիր կովը կաշին չի փոխի»:

Իհարկե պաշտոնական մակարդակով Ռուսաստանը չի պատասխանի Փաշինյանին, քանի որ կարող է հայտնվել ծիծաղելի իրավիճակում: Ռուսաստանն իրեն մրցակից է համարում ԱՄՆ-ին, Գերմանիային, Չինաստանին, բայց ոչ Փաշինյանին: Սակայն անուղղակիորեն Մոսկվան անպայման պատասխանելու է Փաշինյանին:

Փաշինյանը՝ որպես վարչապետ, աղետ է հայ ժողովրդի համար: Եվ որքան շուտ մարդիկ գիտակցեն դա, այդքան քիչ կորուստներ է կրելու Հայաստանը տարբեր ոլորտներում:

Սա՛ է իրականությունը:

Արտակ Հակոբյան