Դա բացատրվում է եղանակային վատ պայմաններով․ ԱԳ նախարարը՝ դիերի որոնողական աշխատանքներն արգելելու Ադրբեջանի որոշման մասին

«Ինչպես տեսնում եք՝ ես շարունակում եմ աշխատել ակտիվ ռեժիմով, խնդրում եմ այլ հարցեր տվեք»: Այս մասին լրագրողների հետ ճեպազրույցի ժամանակ, պատասխանելով իր հնարավոր հրաժարականի մասին տարածված լուրերին, նշեց ԱԳ նախարար Արա Այվազյանը: Հարցին, թե ինչու է Ադրբեջանն արգելել դիերի որոնողական աշխատանքների իրականացումը, Այվազյանը նշեց. «Դա բացատրվում է եղանակային վատ պայմաններով և վստահ եմ, որ մոտ օրերս, եղանակի բարելավման պայմաններում աշխատանքները կվերսկսվեն»:

Ինչ վերաբերվում է ռազմագերիների հարցին՝ նախարարը նշեց, որ ռազմագերիների հարցը 24-ժամյա ռեժիմով իրենց ուշադրության ներքո գտնվող հարցերից է. «Մեր միջգերատեսչական հանձնախումբն աշխատում է բոլոր ուղղություններով: Եթե նկատել եք՝ միջազգային ճնշումը գնալով աճում է և գերիների հայրենադարձության արհեստական խոչընդոտներ ստեղծելու Ադրբեջանի քաղաքականությունը կամաց -կամաց դառնում է գլխացավանք հենց Ադրբեջանի համար: Մենք լիահույս ենք, որ Ադրբեջանը կհրաժարվի պատանդառության քաղաքականությունից և անհապաղ լուծում կտա հումանիտար այս կարևորագույն հարցին»: Թե ինչ ժամկետներում է դա հնարավոր լուծել, Արա Այվազյանը հորդորեց համբերությամբ լցվել և նշեց, որ թե՛ իշխանության, թե՛ միջգերատեսչական հանձնաժողովի և թե՛ մեր միջազգային գործընկերների կողմից արվում է ամեն ինչ:

Այվազյանը շահարկում համարեց լրագրողների այն հարցադրումը, որ նա ամիսներ առաջ հայտարարել էր, թե մենք պատերազմի դաշտում ենք պարտվել, իսկ դիվանագիտական դաշտում ձախողում չենք ունեցել՝ հավելելով, որ այդ կապակցությամբ արդեն արել է հայտարարություն:

Անդրադառնալով նաև Սերժ Սարգսյանի՝ օրերս արած հայտարարությանը և 2018 թվականին Արցախյան հարցը լուծելու հեռանկարների և հնարավորությունների մասին՝ ասաց. «Տարբեր ժամանակներում եղել են այսպիսի հույսի շրջաններ, երբ բոլորիս, այդ թվում՝ համանախագահներին թվացել է, որ կողմերը շատ մոտ են համաձայնության գալուն և բանակցային եղանակով հարցը լուծելուն: Մեղքը, կարծում եմ, ո՛չ համանախագահներինն է, ո՛չ Հայաստանինը: Շատ անգամ, ինչպես օրինակ, Կազանի բանակցությունների ժամանակ, Ադրբեջանը վերջին պահին առաջ է եկել նոր նախապայմաններով, ինչը վկայակոչում է, որ Ադրբեջանը պատրաստ չէր խաղաղ եղանակով լուծել հարցը»:

Աղբյուր՝ Tert.am