Խղճում եմ նրանց, որովհետև անբարոյականի հրամաններն են կատարում. Բագրատ Եսայանը ոստիկանության մասին

Մենք եթե այդ հայտարարությունից վախենայինք, ապա այսօր այստեղ չէինք լինի: Իսկ ինչ վերաբերվում է այդ հայտարարությունը, ապա, եթե բարոյականությունից զուրկ, մարդկային կերպարանքը կորցրած արարածը նման հայտարարություններ է անում, ուրեմն թող իրեն համեմատի իրենց ասած՝ նախկինների հետ: Այս մասին այսօր Երևանում անհնազանդությունների ակցիայի ժամանակ լրագրողների հետ զրույցում ասաց ՀՅԴ անդամ Բագրատ Եսայանը՝ խոսելով երեկ Անդրանիկ Քոչարյանի հայտարարության մասին առ այն, որ եթե քաղաքացիները որոշեն շենքեր գրավել, ապա պետք է պատրաստ լինեն, որ կարող են նրանց վրա կրակել:

Ըստ Եսայանի՝ երբ Նիկոլ Փաշինյանն էր գրավում կառավարական շենքեր, նախկինները այնքան բարոյականություն ունեին, որ ոչ միայն չկրակեցին, այլև որևէ բռնություն չգործադրեցին նրանց նկատմամբ.

«Հիմա կառավարական մեկ շենքից կառավարական մյուս շենք գնալու համար վարչապետի աթոռը զբաղեցնող այդ արարածը ամբողջ ներքին զորքերի համակարգը, ոստիկաններին հանել է փողոց: Հասկանո՞ւմ եք, թե ինչ է, մեր ժողովուրդը հասկանո՞ւմ է, թե ինչ է հիմա կատարվում փողոցում»:

Եսայանը նշեց, որ նրանք, ովքեր չեն բողոքում, չեն պահանջում Փաշինյանի հրաժարականը, ստացվում է՝ ոչ պակաս հողատու են: Վերջինս զարմանք հայտնեց, որ դեռ արժանապատիվ մարդիկ դուրս չեն գալիս փողոց: «Իսկ ոստիկաններին խղճում եմ, որովհետև անբարոյականի հրամանները կատարող են դարձել»,-ասաց նա և հավելեց, որ նմանատիպ հայտարարություններից վախենալ պետք չէ, քանի որ ինչպես 5000-ից ավել նահատակները չվախեցան թշնամու առաջ կռվելուց, այդպես էլ հիմա նրանք չեն վախենում ներքին թշնամու դեմ պայքարելուց:

Աղբյուր՝ Tert.am