Նիկոլի քաղաքական «ցուգցվանգը». Փաշինյանի իշխանությունը շոկի մեջ է շաբաթ օրվա հանրահավաքից

Zham.am-ի իշխանությանը մոտ կանգնած աղբյուրները հայտնում են, որ Փաշինյանն ու իր շրջապատը չէին սպասում, որ շաբաթ օրը ընդդիմության հանրահավաքում այսքան մեծ թվով մարդիկ կհավաքվեն: Այնուամենայնիվ, Փաշինյանի համար ամենավտանգավորը սա չէր, այլ այն, որ հանրահավաքի մասնակիցների այն մասը, ովքեր «բերովի էին», չէին գերազանցում ներկաների ընդհանուր թվի 20-25%-ը: Այլ կերպ ասած, հանրահավաքի մասնակիցների ավելի քան 70%-ը քաղաքացիներ էին, ովքեր եկել էին հրապարակ առանց «կուսակցական մեքենայի» օգտագործման: Սա լուրջ ազդակ է Փաշինյանի համար, որ հասարակության մեջ արդեն ձեւավորվել է «կրիտիկական զանգված», որն անհրաժեշտ է իշխանափոխության համար:

Մյուս կողմից, դա նաև ազդանշան է այն բանի, որ ձեւավորվել է իշխանափոխության հասարակական պահանջ, բայց ընդդիմությունը դեռ ի վիճակի չէ այն իրականացնել: Սրա պատճառները տարբեր են՝ ինչպես օբյեկտիվ, այնպես էլ սուբյեկտիվ: 

Քաղաքագիտական տեսանկյունից ստեղծվե է մի հետաքրքիր, բայց միևնույն ժամանակ տարօրինակ իրավիճակ, երբ հասարակության մեջ ձեւավորվել է բացարձակ պահանջ՝ իշխանափոխություն իրականացնելու, բայց միևնույն ժամանակ քաղաքական ուժ կամ ուժեր, որոնք ունակ են դա իրականացնել դեռ պատրաստ չեն, կամ չեն կարող դա անել:

Համաձայն քաղաքագիտական օրենքների, այս դեպքում կա՛մ կարող է առաջ գալ նոր քաղաքական հարթակ, կա՛մ գործող հարթակը կարող է ենթարկվել լուրջ փոփոխության:

Միաժամանակ, աշխարհաքաղաքական և ներքին սոցիալ-տնտեսական իրավիճակը հուշում է, որ ժամանակն աշխատում է «կայծակնային արագությամբ» ընդդեմ Փաշինյանի:

Նրա համար ձևավորվել է քաղաքական «ցուգցվանգ». նա չի կարող արտահերթ ընտրություններ անցկացնել, քանի որ դրանք կարող են վերածվել իր դեմ ժողովրդական ապստամբության, մյուս կողմից՝ այս իրավիճակն էլ ավելի է մեծացնում իշխանական համակարգի պարալիզացված լինելը:

Այս բոլոր գործընթացների արդյունքում պետական ինստիտուտների էրոզիան էլ ավելի է խորանում՝ լուրջ սպառնալիքներ ստեղծելով հայոց պետականության համար, և ոչ միայն անվտանգության ոլորտում:

Որո՞նք են այս իրավիճակից հնարավոր ելքերը, աստիճանաբար տեսանելի է դառնում, բայց այս մասին կխոսենք մեկ այլ հոդվածում:

Սա՛ է իրականությունը:

Արտակ Հակոբյան