«Вот и все». Ինչ իմաստ ունի ստելը

«Հրապարակ»-ը գրում է. «Մենք այսօր թերթում լուր ենք հրապարակել այն մասին, որ «Նիկոլ Փաշինյանին Ֆեյսբուքում քննադատելու պատճառով աշխատանքից ազատվել են «Բարձրավոլտ էլեկտրացանցեր» ՓԲԸ-ի 3 բարձրաստիճան աշխատակիցներ՝ Վահե Մարտիրոսյանը, որը գլխավոր տնօրենի տեղակալն էր, Գեւորգ Վիրաբյանը՝ իրավական հարցերով խորհրդատուն, եւ Գոռ Մարտիրոսյանը՝ ֆինանսական բաժնի տնօրենը»:

Տեղեկությունը երեկ փորձել էինք ճշտել Գեւորգ Վիրաբյանից, սակայն նա հարցին պատասխանելու փոխարեն հարցրել էր, թե որտեղից է մեզ տեղեկությունը։ «Ձեզ ո՞վ է ասել, հիմա ինձ էլ տեղեկություն է հասել, որ Դուք ինձ գումար եք պարտք»։ Խնդրել էինք ուղղակի հարցին պատասխանել, Վիրաբյանն ասել էր, որ իրեն չեն հեռացրել, շարունակում է աշխատել։ Իհարկե, գլխավոր տնօրենի տեղակալ Վահե Մարտիրոսյանը հաստատել էր, որ իրեն աշխատանքից ազատել են, ուստի լուրը հրապարակել էինք, բայց նա էլ չէր հաստատել, որ ազատվել են Փաշինյանին քննադատելու համար։