Սերժ Սարգսյանն իր ելույթում սպառնաց հեռացողներին (ՏԵՍԱՆՅՈՒԹ)

«Հանրապետական կուսակցության» խորհրդի երեկվա նիստում Սերժ Սարգսյանի ելույթը բավական հետաքրքիր դրույթներ է պարունակում, որոնց արժե անդրադառնալ:

Սերժ Սարգսյանի ելույթից նախ առանձնացնենք երկու կարևոր մեսիջ, որոնք նա փոխանցեց Գագիկ Ծառուկյանին և Հովիկ Աբրահամյանին: Գագիկ Ծառուկյանի մասով նա հստակ արտահայտվեց՝ չի ողջունում: Իսկ ահա Հովիկ Աբրահամյանի մասով խուսափեց կոնկրետություններից և իր ելույթի վերջում միայն ակնարկեց. «Ով համոզված կլինի, որ իր հսկայական պոտենցիալը անարդյունավետ է օգտագործվում, մենք նրանց կառաջարկենք գտնել ավելի արդյունավետ օգտագործող միջավայր»: Ինչպես հայտնի է, ՀՀԿ-ի երկրորդ դեմքը համարվող Հովիկ Աբրահամյանը կուսակցությունից հեռանալու իր հայտարարության մեջ նշել էր, որ չի հեռանում ակտիվ քաղաքականությունից իր պոտենցիալը այլ ձևաչափով է օգտագործելու: «Ես հեռանում եմ ՀՀԿ-ից, բայց շարունակելու եմ ակտիվ զբաղվել քաղաքականությամբ, քանզի համոզված եմ, որ ունեմ բավարար ուժ, գիտելիքներ ու փորձ՝ ծառայելու մեր պետությանն ու ժողովրդին»,-ասել էր նա: 

Սերժ Սարգսյանի ելույթը թեև առաջին հայացքից վստահ մարդու դիրքերից էր, սակայն այն, որ մի քանի անգամ շեշտվեց, թե «ՀՀԿ-ն առաջատար քաղաքական ուժ է», «օրակարգ թելադրող է», «լավագույներն են այսօր հավաքվել ՀՀԿ-ում», «Հանրապետականից արտահոսք չկա», արդեն իսկ խոսում է կուսակցության ներսում առկա անվստահության, խուճապային մթնոլորտի մասին:

Մարտի 1-ի գնով իշխանության եկած Սերժ Սարգսյանի խոսքում հստակ սպառնալիք կար՝ հեռացողնե՛ր, եթե ինձ հետ չեք, վաղ թե ուշ «չորանալու եք»: «Այն առվակները, որոնք պոկվում են մայր գետից և կարճ ժամանակում նորից չեն մտնում նույն հոսքի մեջ, չորանում ու գնում են»,-հստակ հայտարարեց Սերժ Սարգսյանը:

Նա նաև ակնարկեց, որ ինքն անձամբ է որոշելու, թե ընտրություններում ով ինչ դերակատարում կունենա և ով ինչ պաշտոն կզբաղեցնի: «Տեսնում եմ՝ ով որքան է աշխատում, տեսնում եմ՝ ով ինչպես է աշխատում և իմ տեսանկյունից գնահատական եմ տալիս: Եթե մեզնից յուրաքանչյուրը ինքը պիտի որոշի, թե որտեղ է աշխատելու, ինչով պետք է զբաղվի, դա արդեն, ներողություն, բայց կդառնա շիլաշփոթ»,-ասաց Սարգսյանը՝ իր այս հայտարարությամբ ևս մեկ անգամ փաստելով, որ ինչ էլ տեղի ունենա կուսակցությունում, ովքեր ել գան ու գնան, միակ որոշում կայացնողն ինքն է:

ՀՀԿ նախագահի ելույթում նաև անդրադարձ կար, ընտրությունների օրվան՝ ապրիլի 2-ին: Սերժ Սարգսյանը, ինչպես սովորաբար, դա բարդեց այլոց՝ այս դեպքում իր իրավաբանների վրա՝ նշելով, թե ինքը դեմ չէ մի քանի օր հետաձգելուն: Մինչդեռ, Սերժ Սարգսյանն անձամբ է ստորագրել ընտրություններն ապրիլի 2-ին անցկացնելու հրամանագրի տակ՝ առանց հաշվի առնելու օրվա խորհուրդն ու Սահմանադրական պահանջը:

Սերժ Սարգսյանն իր ելույթում փորձեց նաև «մեծահոգի» լինել՝ հայտարարելով, թե իրենք տիրապետում են երկրի խնդիրներին, իրավիճակին և ունեն լուծումներ, և որ իրենց միակ մտահոգությունը երկիրն ու քաղաքական համակարգը կայացնելն է:

Եթե Սերժ Սարգսյանն իր ելույթում հնչեցրած դրույթներն իսկապես ուզում է կյանքի կոչել և դա իսկապես ազնիվ մղումներից ելնելով է ուզում անել, ոչ թե իշխանություն պահելու, ապա պետք է նախևառաջ հայտարարի քաղաքականությունից հեռանալու մասին, միայն այդ ժամանակ հասարակությունը կհավատա նրա խոսքին:

Քանի դեռ նա կուսակցության առաջին աթոռը չի զիջել Կարեն Կարապետյանին և հեռացել քաղաքականությունից, մնացած ամեն ինչը դատարկ խոսակցություններ են, ինչպես ցույց է տվել փորձը:

Իսկ թե ինչ է ցույց տվել փորձը մարտի 1-ի գնով իշխանության եկած Սերժ Սարգսյանի խոսքի արժեքի մասով, դիտեք «Սիվիլնեթի» այս երկու տեսանյութերում: Իսկ երրորդ տեսանյութում կարող եք լսել Սերժ Սարգսյանի երեկվա ելույթը՝ ամբողջությամբ:

Հասմիկ Գրիգորյան

Լուսանկարը՝ Ֆոտոլուրի