Փաշինյանը հենց էս պահին շանս ունի կենդանի մնալով հեռանալ, այլապես գնալու է սրացում, նա չի կարող հաղթել. Բագրատյան. Տեսանյութ

Ես այդ վտանգի մասին ասել եմ, իշխանությունը խոստովանում է, որ այդպիսի բան ստորագրել է, քավորն էլ Վաղարշակ Հարությունյանն է, որն ասում է՝ դե խնդրեցին։ Պաշտպանության նախարարը չգիտի, որ GPS-ով սահման չեն գծում։ Այս մասին այսօր՝ փետրվարի 15–ին, Ազատության հրապարակում լրագրողների հետ զրույցում ասաց ՀՀ նախկին վարչապետ Հրանտ Բագրատյանն՝ անդրադառնալով լրագրողի դիտարկմանը, թե ՄԻՊ–ը տեսանյութ է հրապարակել, որում ադրբեջանական զինված ծառայողները Սյունիքի գյուղերի անմիջական հարեւանությամբ կրակում են տարբեր տրամաչափի զինատեսակներից:

«Դուք կարո՞ղ եք պատկերացնել, որ էն քո բնակարանն է, էստեղից այնտեղ  ադրբեջանական զինվորը զենքով կանգնած է։ Դուք նույնիսկ չեք ցանկանա բալկոն դուրս գաք, որ լվացք կախեք։ Սահմանը պետք է լիներ այ էն վիշկի տեղը, էդպես տվել են, դա հարյուրավոր, հազարավոր քառակուսի կիլոմետր է, որ բացի Ղարաբաղից տվել են»,– նշեց նա։ 

Անդրադառնալով արտահերթ ընտրություններ անցկացնելու պահանջին եւ լրագրողի հարցին, թե ինքը մասնակցելո՞ւ է, Բագրատյանը դրական արձագանքեց։ Հստակեցնող հարցին՝ առանձի՞ն, թե Հայրենիքի փրկության շարժման հետ, նախկին վարչապետն ասաց.

«16 կուսակցությունները  միասնական լինել չեն կարող, նրանց միասնականությունն այսօր Նիկոլին հեռացնելն է, այնտեղ շատ տարբեր ուժեր են, սոցիալիստական, ոչ սոցիալիստական, ես չեմ կարող միանալ։ Քաղաքացիները պետք է հասկանան, որ միասնական չպետք է լինենք, որ 4, 5, 6 ուժ անցի խորհրդարան, ամեն մեկը 10 տոկոսով, սա է դեմոկրատիան, ոչ թե 85 տոկոսանոց պառլամենտն ինչ ուզում անում է։ Քաղաքացին պետք է հասկանա, որ սա է ճիշտ երկիրը»,– նշեց նա։

Հրանտ Բագրատյանը շեշտեց, որ եթե Նիկոլ Փաշինյանը ընտրություններ կազմակերպի, Հայրենիքի փրկության շարժումը չի մասնակցի դրանց, որովհետեւ վստահ են, որ Փաշինյանը ընտրությունները կեղծելու է։

«Նա կկեղծի, որ մնա, որովհետեւ եթե եկանք իշխանության, անպայման ձերբակալվելու է։ Նիկոլ Փաշինյանն իր դատարաններն է ստեղծում, ապօրինի կերպով ստեղծում է եւ պատրաստվում է այդ օրվան, ինքը պատրաստվում է Լինչի դատաստանին»,- ասաց Հրանտ Բագրատյանը։

Նախկին վարչապետը համոզված է, որ մարզերում Նիկոլ Փաշինյանին դեմ են, եւ իրենց փողոցային  պայքարը Նիկոլ Փաշինյանի հրաժարականին հասնելու համար, հաջողության է հասնելու։

 «Նիկոլ Փաշինյանը հենց էս պահին շանս ունի կենդանի մնալով հեռանալ, այլապես գնալու է սրացում, եւ նա չի կարող հաղթել»,- ասաց Հրանտ Բագրատյանը։

Մանրամասները՝ NEWS.am-ի տեսանյութում: