Հողեր են հանձնվում, իրավունք չունենք թույլ տալ, որ Հայաստանի տարածքը 29,800 ք/կմ-ից կդառնա 24,000. Միքայել Մելքումյան. Տեսանյութ

Երկիր հանձնելու, հողեր հանձնելու քաղաքականությունը շարունակվում է: Այս մասին այսօր ԱԺ-ում ճեպազրույցների ժամանակ ասաց ԲՀԿ պատգամավոր Միքայել Մելքումյանը՝ խոսելով Սյունիք այցերի և Գորիս-Կապան ճանապարհին ադրբեջանցիների՝ դրոշներով և զենքերով տեղակայման մասին, որը նրա գնահատմամբ՝ այն եղել է երկկողմ համաձայնությամբ: Հաղորդում է Tert.am-ը։ 

«Եթե անգամ առանց համաձայնության է եղել, նշանակում է, որ ադրբեջանցիներն այդպես ուր ասես կարող են գնալ Հայաստանի տարածքով, բնականաբար, ես ուզում եմ ասել, որ կապիտուլյացիան շարունակվում է և եթե իշխանությունը սա շարունակում է, ապա ընդդիմությունը պետք է իրականացնի հրատապ մոբիլիզացիա: Այսինքն՝ ժողովուրդը պետք է այս իշխանության ընդդիմությունը դառնա և շատ արագ, որովհետև մենք հիմա չգիտենք Խորհրդային Հայաստանի 29,800 քառակուսի կմ-ից ինչքանն է մնացել, որևէ մեկը սա չի կարող ասել»,-ասաց նա:

Խոսելով «Հայրենիքի փրկության շարժման»՝ այսօր հրավիրված հանրահավաքի մասին՝ Մելքումյանը նշեց, որ այն հրատապ հավաք է լինելու, քանի որ ինչպես նոյեմբերի 9-ին հանրությունն ինքնաբուխ ոտքի ելավ, այնպես էլ հիմա, քանի որ ըստ երևույթին՝ նույն գործընթացն է տեղի ունենում, հողեր են հանձնվում: Ըստ նրա՝ նույնիսկ եղանակային պայմանների փոփոխություններից հետո կրկին տեղի են ունենալու GPS-ով գծանշումներ: «Հիմա մենք նստենք, սպասենք, որ ձյունը կգնա, Հայաստանի տարածքը 29,800 քառակուսի կմ-ից կդառնա 24 հազար, սա նորմա՞լ է: Ես հասկանում եմ, որ այս հրատապությունը դրանով է պայմանավորված»:

Պատգամավորը պատմեց, որ Սյունիքից իմքայլական պատգամավորի հարցրել է, թե այս իրավիճակում բանակցող կա՞, թե՞ չկա, թե՞ հակառակը, ծրագիր են կազմում մնացյալ հողերը հանձնելու: Մելքումյանը շեշտեց, որ ամբողջովին ճշտել են, թե Խորհրդային Հայաստանի ժամանակ, որ տարածքն է եղել Հայաստանի կազմի մեջ, որը Ադրբեջանի և այն տարածքները, օրինակ Շուռնուխից, որոնք հանձնվեցին, վերջերս եղել են հայկական:

«Դեռ պետք է բացահայտվի, թե այդ թույլտվության հուշագրերը երբ են ստորագրվել, գալուց առա՞ջ, թե՞ հետո: Երկրորդ տարբերակի դեպքում դա ցույց է տալիս մեր անկարողությունը, այսինքն՝ ուր ուզեն՝ կմտնեն, մենք էլ ստիպված կհամաձայնենք: Սա շատ վատ պրակտիկա է: Եթե նոյեմբերի 10-ից հետո այդ հրաժարականները լինեին, վստահաբար, շատ բաներ այն պատկերը չէին ունենա, ինչը հիմա ունենում է: Մենք իրավունք չունենք սա թույլ տալ, մենք էլ ենք օրենսդիր իշխանության մաս և պետք է դրսևորենք խիստ անհանդուրժողականություն այս դավաճանական գործունեության նկատմամբ»,- ընդգծեց ԲՀԿ պատգամավորը:

Մանրամասները՝ Tert.am-ի տեսանյութում