Ադրբեջանը պետք է թույլ տա, որ մենք գնանք Դադիվանք, և ցավն այն է, որ մենք դրան համաձայնում ենք. Տեր Հովհաննես
Այո, Ադրբեջանը պետք է մեզ թույլ տա, որ մենք գնանք Դադիվանք և ցավն այն է, որ մենք դրան համաձայնում ենք: Այս մասին այսօր Tert.am-ի հետ զրույցում ասաց Մարտակերտի շրջանի հոգևոր հովիվ Տեր Հովհաննես քահանա Հովհաննիսյանը:
Տեր Հովհաննեսը շատ բան չցանկացավ ասել, բայց, ըստ նրա, բնականաբար, վտանգվում է հայերի անվտանգությունը. «Պիտի ստուգեն քաղաքացիների ինքնությունը, ընտանիքի անդամներին, ամուսնու, հոր մասին, որտեղ են կռվել, ինչ պաշտոն ու շքանշան ունի: Այս ամբողջ ինֆորմացիան կստանան, կթույլատրեն, հետո այնտեղ կբռնեն, կասեն, թե ահաբեկիչ են բռնել: Սա է ամբողջ խնդիրը և մեր իշխանավորները սա չեն հասկանում»:
Քահանան նշեց՝ Դադիվանքում հիմա կոնկրետ վանահայր չկա, բայց հերթափոխով ծառայող հոգևորականներ կան:
Հիշեցնենք, որ Արցախի տարածքները թշնամուն անցելուց հետո Դադիվանքում հայերի մուտքը միայն լինելու էր կիրակի օրերին՝ ռուս խաղաղապահների ուղեկցությամբ, այժմ նաև Ադրբեջանին են ներկայացվելու ուխտավորների անվանացանկերը: Այս մասին ավելի վաղ հայտնել էր Հայ Առաքելական եկեղեցու Արցախի թեմի առաջնորդ Տեր Վրթանես եպիսկոպոս Աբրահամյանը՝ ներկայացնելով, որ ադրբեջանական կողմը Դադիվանք մեկնող ուխտավորների խմբին արգելել էր մուտք ունենալ վանական համալիր՝ պատճառաբանելով, որ այսուհետ պետք է ներկայացվեն ուխտագնացների անվանական ցուցակներ:
Հետևեք մեզ Facebook-ում