Մենք չենք կարող զբաղվել միայն մեկ հարցով. Արարատ Միրզոյանը` Աժ նիստի օրակարգում Արցախի հիմնախնդրին և պատերազմին վերաբերվող հարցերի բացակայության մասին

Աժ հերթական նիստին «Լուսավոր Հայաստան» խմբակցության անդամ Տարոն Սիմոնյանը իշխող մեծամասնությանը դիտողություն արեց՝ նիստի օրակարգում ընդգրկված 16 հարցերից ոչ մեկը երկրի առջեւ ծառացած մարտահրավերներին ուղղված չէ։4 տարի, 8 ամիս, 19 օր. սա այն ժամանակն է, որի ավարտից հետո Ադրբեջանի ղեկավարը կարող է այն տխրահռչակ հայտարարության հիման վրա պահանջել ռուսական խաղաղապահ ուժերի դուրսբերումը Արցախից։ Սա նաև այն ժամանակն է, որ մենք պետք է օգտագործենք, որպեսզի պատրաստ լինենք նման հավանական զարգացմանը։

«Ուզում եմ հասկանալ՝ մեր օգտագործվող ժամանակահատվածին արդյո՞ք արդյունավետ տիրապետում ենք, թե՞ ոչ», - դիմելով ԱԺ նախագահ Արարատ Միրզոյանին՝ ասաց Սիմոնյանը։

Արձագանքելով Արարատ Միրզոյանն ասաց, թե իսկապես շատ մեծ մարտահրավերներ կան, որոնց պետք է ադեկվատ արձագանքել։

« Այո՛, ԱԺ-ն զանազան գործընթացներում իր դերակատարումը ևս ունի, բայց ԱԺ-ի այլ՝ առօրյա պարտականությունները ոչ ոք անվավեր չի ճանաչել և չի էլ կարող։ Մենք ունենք նաև բազմազան այլ խնդիրներ մեր առջև կանգնած, մենք չենք կարող զբաղվել միայն մեկ հարցով», - ասաց Արարատ Միրզոյանը։

Zham.am