Հայաստանում կարող են խստացնել այլ պետության օգտին լրտեսության և հայրենիրքի դավաճանության համար պատիժը

Հայաստանում անհրաժեշտ է խստացնել այլ պետության օգտին լրտեսության եւ հայրենիրքի դավաճանության համար պատիժը: Այս մասին փետրվարի 4-ին Ազգային ժողովում Պետաիրավական հարցերի խորհրդարանական մշտական հանձնաժողովի նիստում ասաց Քրեական օրենսգրքում փոփոխություններ կատարելու մասին օրենսդրական նախաձեռնության հեղինակ, «Բարգավաճ Հայաստան» կուսակցությունից խորհրդարանի փոխխոսնակ Վահե Էնֆիաջյանը:

Պատգամավորը, մասնավորապես, առաջարկեց մեծացնել այդպիսի հանցագործությունների կատարման համար պատժաժամկետը: «Այս հանցագործություններն իրենց ծանրության աստիճանով չի կարելի որեւէ կերպ համեմատել այլ հանցագործությունների հետ»,- ընդգծեց ընդդիմադիր պատգամավորը՝ նշելով, որ պատիժը պետք է համապատասխանող լինի:

Էնֆիաջյանի խոսքով՝ Թուրքիայի ռազմաքաղաքական աջակցությամբ Արցախի դեմ Ադրբեջանի սանձազերծած լայնածավալ ռազմական ագրեսիան, որը սկսվեց 2020 թվականի սեպտեմբերի 27-ին, հանգեցրեց պետական դավաճանության կամ լրտեսության դեպքերի, ինչը վկայում է գործող իրավական բազայում բացերի մասին:

Խորհրդարանականի կարծիքով՝ հիշատակված դեպքերը ցույց են տալիս, որ գործող իրավա-նորմատիվային ակտերը չեն կանխում դավաճանությունը կամ լրտեսությունը, ուստի որպես նախազգուշական միջոց անհրաժեշտ է որոշել Քրեական օրենսգրքի շրջանակում խիստ պատժի խստության չափը: Դրանից ելնելով՝ առաջարկվում է լրտեսության եւ հայրենիքի դավաճանության համար սահմանել 20 տարուց մինչեւ ցմահ բանտարկություն՝ գույքի բռնագանձման իրավունքով:

Երկարատեւ քննարկումներից հետո իշխող «Իմ քայլը» դաշինքի պատգամավորները, մասնավորապես, առաջարկեցին նման կարգի հանցագործությունների կատարման համար սահմանել պատժի նվազագույն եւ առավելագույն նշաձողեր, ինչի հետ ԱԺ ԲՀԿ-ական փոխխոսնակը համաձայնվեց:

Այսպիսով՝ նվազագույն նիշ սահմանվեց 12 տարվա սահմաններում (լրտեսություն կատարած անձանց համար) եւ 15-ից մինչեւ 20 տարի՝ գույքի բռնագանձման իրավունքով կամ առանց դրա անձանց համար, որոնք կատարել են հայրենիքին դավաճանություն: Այդուհանդերձ, Հայաստանում հայրենիքի դավաճաններին կարող է սպառնալ նաեւ ավելի խիստ պատիժ՝ ցմահ ազատազրկում: Էնֆիաջյանը համաձայնվեց իր օրինագծի մեջ մտցնել այս լրացումները եւ հաշվի առավ հնչած առաջարկները:

Արդյունքում՝ խորհրդարանական հանձնաժողովը դրական եզրակացություն տվեց «Բարգավաճ Հայաստանի» առաջարկած օրենսդրական նախաձեռնությանը: Այսպիսով, օրինագիծը որոշակի փոփոխված եւ լրացված ձեւով կմտնի խորհրդարանի լիագումար նիստի օրակարգ: