Արայիկ Հարությունյանը «ավետում» է, որ դեռ ավելի ծանր որոշումների առջև է կանգնելու Արցախը. Տեսանյութ
Հունվարի 21-ին աշխատանքի, սոցիալական և միգրացիայի հարցերի նախարարության աշխատակիցների հետ հանդիպման ժամանակ Արցախի նախագահ Արայիկ Հարությունյանը հայտարարեց, որ «...Արցախին սպասվում են դեռ ավելի շատ ծանր որոշումներ...»: Հետո նա մանրամասնեց, որ դա կապված է ոչ միայն սոցիալ-տնտեսական, այլև անվտանգության հարցերով:
Ավելին` նա չմանրամասնեց, որպեսզի մարդկանց մոտ ավելորդ խուճապ չառաջացնի: Սակայն շատ բան, նույնիսկ Արայիկ Հարությունյանը չգիտի: Օրինակ` Ալիևը հայտարարում է, որ իր համար «ԼՂՀ հարց այլևս գոյություն չունի»: Ավելին` նա արդեն հայտարարում է, որ «այդ հարցը նա այլևս Հայաստանի հետ չի քննարկելու»:
Նաև նշում, որ «Ղարաբաղը, որևէ կարգավիճակ չի ունենալու Ադրբեջանի կազմի մեջ»: Ինչն իր հերթին նշանակում է, որ վաղ թե ուշ նա բարձրացնելու է այսօրվա Արցախի ղեկավար մարմինների լեգիտիմության հարցը:
Հայ հանրությունը, և նույնիսկ երկրի ընդդիմադիր վերնախավի մեծ մասը լիարժեքորեն չեն պատկերացնում, թե ինչ դժվարին օրեր են սպասվելու Հայաստանին և Արցախի այն հատվածին, որն այսօր վերահսկվում է մեր կողմից:
Բնականաբար, այս հարցերը օրակարգային են դառնալու մի քանի ամիս անց, երբ գարնանը, եղանակային փոփոխությունների արդյունքում Ալիևը պահանջելու է Մոսկվայից սահմանափակել ներկայիս Արցախի ղեկավարների գործնեության աստիճանը:
Այսօր Ալիևն իր լռությունը պատճառաբանում է բացառապես, իբրև «հումանիտար» խնդիրներով` նշելով, որ ձմռանը նա չի ուզում, որ այս տարածքում մարդիկ ենթարկվեն հումանիտար աղետի:
Այս ամենի մասին գիտի նաև Նիկոլ Փաշինյանը, սակայն հասկանալի պատճառներով դեռ չի ուզում դրա մասին արտահայտվել` հասկանալով, թե ինչ նոր ռեզոնանս կարող է առաջանալ հանրության մեջ:
Նա միջնորդների միջոցով նույնիսկ խնդրել է Ալիևին դեռ չբարձրացնել այդ հարցերը, մինչև Հայաստանում չանցկացվեն արտահերթ ընտրություններ, որպեսզի, նրա բնորոշմամբ, «Հայաստանում ռևանշիստները չկարողանան իշխանության վերադառնալ»: Փաշինյանն միջնորդների միջոցով համոզում է Ալիևին, որ այդ հարցում նրա և Ալիևի շահերը համընկնում են:
Չի բացառվում նաև, որ գերիների հարցն էլ Ալիևը կլուծի Հայաստանի ընտրական փուլում հենց այն պահին, որից Փաշինյանը մաքսիմում կարող է շահեկան դուրս գալ:
Արտակ Հակոբյան
Հետևեք մեզ Facebook-ում