«Անբարոյականություն է գերիների, անհայտ կորածների խնդիրները չլուծած՝ խոսել տնտեսական շահի մասին. սպասումները շատ տագնապալից են». Մեղրիի քաղաքապետ

Մեղրիի քաղաքապետ Մխիթար Զաքարյանի խոսքով՝ իրավիճակը Մեղրիում այնպես է, ինչպես ամբողջ Հայաստանում, սակայն այնտեղ մի փոքր լարված է։

«Մենք այս ամենի անմիջական ազդակիրն ենք, գտնվում ենք կենտրոնում։ Բայց լավ կլիներ, որ այդ մտահոգությունը հավասարապես բաշխված լիներ՝ Երևանում նույնպես այդ մտահոգություններն ունենային»,-168.am-ի հետ զրույցում ասաց Մխիթար Զաքարյանը։

Անդրադառնալով Սյունիքով Ադրբեջանը և Նախիջևանը կապող ճանապարհին և առհասարակ ճանապարհների ապաշրջափակմանը, Մխիթար Զաքարյանն ասաց, որ ամեն ինչ կախված է իրագործման մեխանիզմներից։

«Ասում են միջանցք․ միջանցքը շատ մեծ հասկացություն է, անընդհատ սա կրկնում եմ։ Եթե այնպես լինի, ինչպես մենք օգտվում ենք Վրաստանի տարածքից՝ Բագրատաշենով մտնում ենք և Լարսով դուրս գալիս, այսինքն՝ տրանզիտ ենք օգտագործում, Ռուսաստանի Դաշնություն գնալու համար։ Եթե նույն տրամաբանությամբ լինի, և անվտանգությունն էլ ապահովելու են ռուս սահմանապահները, որոնք Խորհրդային Միության ժամանակ և մինչև այսօր հայ-իրանական սահմանի պահպանությունն են իրականացնում և բարձր մակարդակով են իրականացնում, ապա կարծում եմ՝ խնդիր չի լինի։ Ընդհանրապես աշխարհագրական դիրքով այդ ենթադրվող ճանապարհը և հայ-իրանական սահմանը նույն տարածքում են։ Եթե այդ տրամաբանությամբ շարունակենք, ռուսական սահմանապահների երաշխավորությունը լինի, անվտանգության տեսակետից նորմալ է։ Բայց հաշվի առնելով մեր իրականությունը, իսկ ավելի կոնկրետ՝ մեր կառավարության ղեկավարի պաշտոնը զբաղեցնողի «սովորությունները», բանավոր պայմանավորվածությունը, կամ, երբ ուրիշ բան պայմանավորվում են, այլ բան հայտարարում, իհարկե, մտավախությունները շատ են։ Շատ տագնապալից են սպասումները»,- նշեց մեր զրուցակիցը։

Ըստ նրա, յուրաքանչյուր իրավիճակից էլ ելք կա, ավելին՝ հասկանում են, որ պատերազմում պարտվել են, և իրենց կամքից անկախ՝ սխալների դառը պտուղները պետք է քաղեն, բայց պարտություն էլ կա՝ պարտություն էլ, ճանապարհ էլ կա՝ ճանապարհ էլ։

Անդրադառնալով իշխանության ներկայացուցիչների այն հայտարարություններին, թե Մոսկվայում ստորագրված փաստաթղթում Հայաստանն իր շահերն ունի տնտեսական առումով, քանի որ փակ ճանապարհները բացվում են, Մխիթար Զաքարյանն ասաց, որ այս պահին նպատակահարմար չէ խոսել այդ մասին, նույնիսկ անհարմար է։

«Մեր վերքերը թարմ են, եթե այդպիսի խելոք մտքեր ունեին, պետք է այնպես անեին, որ պատերազմ չլիներ։ Գերիների առկայության պարագայում, կարծում եմ՝ կոռեկտ չէ, անբարոյականություն է գերիների, անհայտ կորածների խնդիրները չլուծած՝ խոսել տնտեսական շահի մասին։ Ինքս տնտեսագետ եմ, բոլոր հարցերին նայում եմ տնտեսագիտական պրիզմայով, բայց… Մենք, իհարկե, Խորհրդային Միության ժամանակ ունեցել ենք այդ ճանապարհը՝ Մեղրիից Երևան Նախիջևանով ենք եկել, ասեմ՝ նույնիսկ այն ժամանակ էին վտանգներ լինում։ Այդ կապիտուլյացիոն պայմանագրում, Մեղրիի կամ ՀՀ տարածքում երաշխավորը ռուս սահմանապահներն են լինելու, Նախիջևանի անվտանգության երաշխավորության մասին որևէ խոսք ասված չէ։ Մեր այսօրվա իրականության մեջ ամեն ինչ հեղհեղուկ է ու անորոշ, այս հարցերն էլ են այդպիսին, ցանկացած գուշակություն կլինի ինքնանպատակ, որովհետև շատ բաներ տրամաբանությանը չեն ենթարկվում, անգամ մեր տրամաբանությունը չի բավարարում հասկանալու»,- եզրափակեց Մխիթար Զաքարյանը։

Հիշեցնենք, որ հունվարի 11-ին Մոսկվայում Նիկոլ Փաշինյանը ստորագրել էր երկրորդ եռակողմ փաստաթուղթը, որի համաձայն՝ ապաշրջափակվում են բոլոր ճանապարհները, և Ադրբեջանը ցամաքային ճանապարհով Հայաստանի տարածքով միանալու է Նախիջևանին։

Աղբյուր՝ 168.am