Արցախում այսօր կվերականգնվի «5-րդ ալիքի» հեռարձակումը

ArmDaily.am-ի տեղեկություններով՝ այսօր Արցախում վերականգնում են «5-րդ ալիքի» հեռարձակումը: Մենք փորձեցինք թեմայի հետ կապված տեղեկությունները ճշտել «5-րդ ալիքի» տնօրեն Հարություն Հարությունյանից։

-Պրն. Հարությունյան, ArmDaily.am-ի տեղեկություններով` այսօր Արցախում վերականգնում են «5-րդ ալիքի» հեռարձակումը: Ինչպե՞ս հնարավոր եղավ վերահեռարձակումը:

-Չգիտեմ, Արցախից պետք է հարցնեք, իրենք էին անջատել պատերազմից առաջ առանց մեզ տեղեկացնելու:

-Դուք չե՞ք դիմել:

-Մենք նամակով դիմել ենք պարզաբանում ստանալու ՝ ինչու են անջատել և արդյո՞ք նախատեսում են երբևիցե հեռարձակել, որպեսզի մենք հասկանանք առաջիկայում մեր ցանցային քաղաքականությունը ինչպես կազմակերպենք:

-Եւ՞, պատասխանե՞լ են:

-Դեռ ոչ, միայն գիտեմ, որ ցանկություն ունեն վերականգնել հեռարձակումը: Ես դեռ սպասում եմ պաշտոնական պատասխանին:

-Մենք տեղեկացանք, որ այսօր միացնում են, Դուք տեղյակ չե՞ք:

- Մեր տեխնիկական տնօրենին են զանգահարել և ինչ որ աշխատանքներ են անում համատեղ: Ես հանձնարարել եմ, որ օգնեն:

-Այնուամենայնիվ, ինչպես նախկինում էիք մտածում, հիմա էլ նույն կարծիքի՞ն եք։

-Ես ոչ թե մտածում էի, այլ փաստերն էի արձանագրում և համադրում: Հիմա էլ նույն կարծիքին եմ՝ մեր ալիքը փակելը Արցախում նախատեսված պարտության ծրագրի մաս էր կազմում: Ես ասել եմ, հիմա էլ կրկնում և հաստատում եմ: Հիշո՞ւմ եք ոչ անհայտ պատգամավորը, ում անունը շրջանառվում է որպես օտարերկրյա գործակալական ցանցի ակտիվ անդամ, ինչ էր գրել մեր ալիքի փակման օրը: Նա էր այդ գործընթացի քավորը և եւս մեկը, ում անունը չեմ նշում, որ շուրթերիս դառնություն չիջնի:

- Պրն. Հարությունյան, ուրբաթ օրը ՀՌԱՀ-ը հայտարարելու է մրցույթի արդյունքները և եթե Ձեր հեռուստաընկերությունը արտոնագիր չստանա, ի՞նչ եք անելու: Գուցե սպասեիք արտոնագրին, նոր վերահեռարձակվեիք Արցախում:

-Հնարավոր է , որ չստանանք, հնարավոր է նաև՝ հակառակը, բայց դա ողբերգություն չպետք է դարձնենք: Տեսալսողական մեդիայի մասին օրենքի համաձայն մենք հեղինակազորվել ենք և այլ՝ հնարավոր բոլոր տարբերակներով մենք շարունակելու ենք լինել եթերում: Այնպես որ մեկը մյուսին չի խանգարելու: Իհարկե ցանկալի է, որ հանրային մուլտիպլեքսում ունենանք մեր տեղը, բայց չունենալու դեպքում էլ շարունակելու ենք աշխատել: Մեր հետագա ծրագրերը իրականացնելու համար, իսկ դրանք բավականին հավակնոտ են, ոչինչ չի կարող խանգարել: Դժվարություններ կստեղծվեն, բայց բոլոր դժվարությունները հաղթահարելի են եթե հարցին մոտենում ես պրոֆեսիոնալ տեսանկյունից և համռությամբ:

Մանրամասները՝ ArmDaily.am-ում: