Պետք է գործողություններով ցույց տանք մեր ներուժը ու թույլ չտանք, որպեսզի մեր ճակատագիրը որոշեն բոլորովին այլ տեղ, այլ թղթերի վրա․ Հայկ Դեմոյան

Պատմությունը և գիտությունը ոչ թե անցյալի, այլ ապագայի մասին է։ Այս մասին մտավորականների հավաքի ժամանակ ասաց Հայոց ցեղասպանության թանգարան-ինստիտուտի նախկին տնօրեն, պատմական գիտությունների դոկտոր Հայկ Դեմոյանը։

Նրա խոսքով՝ արժե 2.5  տարի հետ գնալ և հասկանալ, թե այդ տարիների ֆենոմենն ինչից սկսվեց։ «Ցավոք սրտի, 2010 թվականից ես ահազանգում էի, որ մենք սպանում ենք մեր հասարակությանը այն արժեքներով, որը դնում ենք շրջանառության մեջ և ստանում ենք զանգված։ Ես ասում էի, որ մենք այսպիսի գործողություններով, այսպիսի քայլերով մանիպուլյատիվ մեծ գործարքի հնարավորություն ենք ստեղծելու ապագայում։ Ցավոք սրտի, այդ մանիպուլյատիվ գործողությունները տեղի ունեցան»,-ասաց Դեմոյանը։

Դեմոյանը ցավով արձանագրեց, որ երկուսկես տարի առաջ հրապարակում տեղի ունեցածը մանիպուլատիվ գործողությունների հետևանքն էր: «Երկուսուկես տարի առաջ տեղի ունեցածը հետևանքն էր նախադրալների, որոնք ստեղծվել էին վաղուց։ Դա անհերքելի է։ Նոյեմբերի 9-ից հետո պիտի ունենանք հունվարի 11: Ես դրական որևէ բանի ակնկալիք չունեմ։ Բայց այսօր գլոբալ առումով պետք է խոսենք՝ ուր ենք շարժվելու, արդյո՞ք առաջ շարժվելու այն ուղին ենք վերցնելու, որը կա, թե պետք է շատ լուրջ վերանայում անենք»,- ասաց Դեմոյանն ու հավելեց, որ այժմ խորագույն ճգնաժամ է, որից պետք է ելքեր գտնել։ Ըստ նրա՝ այդ ելքերը կան։

«Չպետք է թույլ տալ, որպեսզի կրկնվի, չպետք է թույլ տալ, որպեսզի մեր ապագան, ճակատագիրը որոշեն բոլորովին այլ տեղ, այլ թղթերի վրա։ Այդ ներուժը պետք է ցույց տանք։ Իսկ այդ ներուժը դոլարների քանակով չի չափվում, այլ գործողություններով»,- ասաց Հայկ Դեմոյանը։

Աղբյուր՝ Tert.am