Որևէ մեկը չգիտի՝ Նիկոլ Փաշինյանը հերթական ինչպիսի ստորացման է պատրաստ. Էլինար Վարդանյան. Տեսանյութ

Հնարավոր է՝ Մոսկվայում հանդիպումը լինի հերթական ոչ կշռադատված և Հայաստանի Հանրապետության համար ստորացուցիչ փաստաթուղթը: Այս մասին այսօր՝ հունվարի 8-ին, Արդարադատության նախարարության դիմաց հավաքի ժամանակ լրագրողների հետ զրույցում հայտարարեց Այլընտրանքային նախագծեր խմբի անդամ Էլինար Վարդանյանը:

 «Ես կարծում եմ՝ եթե Փաշինյանը գնում է Մոսկվա, ուրեմն՝ նոյեմբերի 9-ի փաստաթղթի շարունակությունը պետք է լինի: Եթե Հայաստանի Հանրապետությանը սպասվում է հերթական ստորացումը, ապա մենք իրավունք ունենք իմանալ, թե ինչի շուրջ են լինելու բանակցությունները, և ինչ փաստաթուղթ է ստորագրվելու: Նոյեմբերի 9-ից հետո տեղի ունեցան իրադարձություններ, որոնք նոյեմբերի 9- փաստաթղթի մեջ որևէ ձև արծածված չէին: Դրանք բանակցություններից դուրս պայմանավորվածություններ էինք, որոնք միայն Արցախի, այլ նաև Հայաստանի Հանրապետության համար ոչ նպաստավոր էին: Այսպիսի հարցերը բանավոր պայմանավորվածություններով չեն լուծվում: Մենք չգիտենք՝ ինչ է կատարվում Փաշինյանի գլխում: Ամեն հաջորդ անգամ տեսնում ենք՝ չկշռադատված որոշումներ են լինում: Ես ունեմ մտավախություն, որ Մոսկվայում հանդիպման արդյունքը լինելու է հերթական ոչ կշռադատված և մեզ համար ստորացուցիչ փաստաթուղթը: Մենք այսօր այստեղ հավաքվել ենք, որովհետև իրավունք ունենք իմանալու, թե ինչի շուրջ են ընթանում բանակցությունները և ինչ փաստաթուղթ է պատրաստվում: Եվ այսօրվա բառակույտը, որ Փաշինյանն իր սոցիալական ցանցում հրապարակել էր, խոսում է այն մասին, որ մտահոգությունները տեղին են: Որևէ մեկը չգիտի՝ ինքը հերթական ինչպիսի ստորացման է պատրաստ: Այլ բան այդ մարդուց ակնկալել հնարավոր չէ»,- նշեց Էլինար Վարդանյանը:

Էլինար Վարդանյանի կարծիքով՝ Արդարադատության նախարարությունը հարցը սահմանադրականորեն չի կարող որոշել, սակայն սա նախնական քայլ է ստորագրվող փաստաթուղթը ՍԴ ներկայացնելու և դրա վիճարակումը կանխելու համար:

«Իրավական տեսակետից արդարադատության նախարարության կողմից կարող է փաստաթղթի քննարկում լինել, քանի որ արդարադատության նախարարությունը չէ հարցը սահմանադրությամբ որոշողը, բայց սա կարող է լինել նախնական քայլ՝ հետագայում ստորագրվող փաստաթուղթը Սահմանադրական դատարան ներկայացնելու և դրա վիճարկելիությունը կանխելու նպատակով: Եվ եթե հիմա այստեղ է այդ փաստաթուղթը, ապա այն պետք է հանրայնացվի: Հանրությունը չպետք է նոյեմբերի 9-ի նման անակնկալի գա: Հարցը միայն հերքում  տարածելը չէ, այլ թափանցիկ և հրապարակային լինելը, ոչ թե 44 օր ստել և ասել, որ նման փաստաթուղթ չկա: Եթե իշխանությունն անպատրաստ է գնում նման ճակատագրական հանդիպման, նշանակում է՝ պարզապես չունենք իշխանություն»,- ասաց Էլինար Վարդանյանը:

Ըստ՝ Էլինար Վարդանյանի, եթե հասարակության պայքարը դուրս գա սոցիալական ցանցերից և տեղափոխվի իրական դաշտ, ապա հնարավոր փաստաթղթի ստորագրումը կկանխվի:

«Մենք հասել ենք մի իրավիճակի, որ հանրությունն իր պայքարը սոցիալական ցանցում է իրականացնում: Սոցիալական ցանցում պայքարելն ավելի հեշտ է, քան դրսում: Եթե իրավական տեսանկյունից նայենք, ապա դատախազությունը վաղուց պետք է ձեռնամուխ լիներ որոշ պետական պաշտոնյաների ձերբակալմանը, բայց մենք շեղվել ենք իրավական պետությունից, 2.5 տարի մերժվել են իրավունքը և օրենքները: Ակնկալել, որ դատախազությունը հիմա նման բան կանի, միամտություն է»,- ավելացրեց Էլինար Վարդանյանը:

Հիշեցնենք, որ քաղաքացիները և իրավապաշտպանները բողոքի ակցիա են անում Արդարադատության նախարարության դիմաց։ Նրանք պահանջում են հրապարակել հունվարի 11-ին Մոսկվայում ստորագրվելիք փաստաթուղթը։ Նրանք համոզված են, որ նախարարությունում է գտնվում և ընթացակարգեր է անցնում մի փաստաթղթի նախագիծ, որով Նիկոլ Փաշինյանը վավերացնելու է Հայաստանի ինքնիշխան հանրապետության տարածքները Ադրբեջանին ապօրինի հանձնելու գործընթացը: