Գալուստ Սահակյանն ընդունել է Հայաստանում Սերբիայի նորանշանակ դեսպանին
ՀՀ ԱԺ նախագահ Գալուստ Սահակյանն ապրիլի 19-ին ընդունել է Հայաստանում Սերբիայի Հանրապետության նորանշանակ դեսպան Դուշան Սպասոևիչին:
Ողջունելով դեսպանին ՀՀ Ազգային ժողովում՝ Գալուստ Սահակյանը շնորհավորել է նրան Հայաստանում Սերբիայի արտակարգ և լիազոր դեսպան նշանակվելու առթիվ և մաղթել արդյունավետ աշխատանք:
Անդրադառնալով հայ-սերբական հարաբերություններին՝ Ազգային ժողովի նախագահը նշել է, որ դրանք հիմնված են բարեկամության և փոխադարձ աջակցության վրա: Այդ համատեքստում Գալուստ Սահակյանը կարևորել է երկու երկրների խորհրդարաններում գործող բարեկամական խմբերի դերը երկկողմ հարաբերությունների զարգացման, երկու ժողովուրդների միջև կապերի ամրապնդման գործում:
ԱԺ նախագահը, ընդգծելով խորհրդարանական դիվանագիտության կարևորությունը, խոսել է նաև միջազգային կառույցներում փոխադարձ աջակցության և համագործակցության մասին:
Շնորհակալություն հայտնելով ընդունելության համար՝ Դուշան Սպասոևիչը ներկայացրել է իր երկրում տեղի ունեցած քաղաքական փոփոխությունները և ՀՀ ԱԺ նախագահին փոխանցել Սերբիայի Ազգային ժողովի նախագահի ողջույնները:
Անդրադառնալով երկու ժողովուրդների ճակատագրերին և պատմական ընդհանրություններին՝ նորանշանակ դեսպանը կարևորել է տարբեր բնագավառներում երկու պետությունների միջև համագործակցության խթանումը, ժողովուրդների բարեկամության ամրապնդումը:
Ներկայացնելով առաջիկա ծրագրերը՝ Դուշան Սպասոևիչը խոսել է երկու երկրների միջև մուտքի արտոնագրերի ազատականացման և Սերբիայում ու Հայաստանում դեսպանությունների բացման հեռանկարի մասին:
Գալուստ Սահակյանն իր աջակցությունն է հայտնել դեսպանի ներկայացրած նախաձեռնություններին և հաջողություն մաղթել գործունեության մեջ:
Հետևեք մեզ Facebook-ում