Գորիսի քաղաքապետ Առուշ Առուշանյանը չի կալանավորվի. դատարանը մերժեց քննիչի միջնորդությունը

Երեւան քաղաքի ընդհանուր իրավասության դատարանը՝ նախագահությամբ դատավոր Ռոբերտ Պապոյանի, այսօր՝ դեկտեմբերի 24-ին, մերժեց Գորիսի քաղաքապետ Առուշ Առուշանյանի նկատմամբ կալանավորումը որպես խափանման միջոց ընտրելու վերաբերյալ նախաքննական մարմնի միջնորդությունը։

Դատարանի որոշման հրապարակումից հետո Առուշանյանը լրագրողների հետ զրույցում նշեց, որ հարուցված քրեական գործերը շինծու են, այդ պատճառով էլ արդարությունը հաղթեց. «Դատարանն օբյեկտիվությունը պահպանեց»։

Առուշանյանի պաշտպան Արմեն Մելքոնյանն էլ ասաց, որ դատարանը մերժել է միջնորդությունը՝ բավարար հիմքերի բացակայության պատճառով։

Հիշեցնենք, որ Գորիսի քաղաքապետին մեղադրանք է առաջադրվել ՀՀ ՔՕ 308-րդ հոդվածի 1-ին մասով, 38-188-րդ հոդվածի 3-րդ մասի 1-ին կետով, 38-291-րդ հոդվածի 2-րդ մասով, 34-322-րդ հոդվածի 2-րդ մասով, 113-րդ հոդվածի 2-րդ մասի 3-րդ եւ 6-րդ կետերով եւ 34-225.1-րդ հոդվածի 1-ին մասով։

Նշենք, որ դատարանը դեկտեմբերի 22-ին ոչ իրավաչափ էր ճանաչել նաեւ Առուշանյանի ձերբակալման որոշումը։

Հիշեցնենք, որ դեկտեմբերի 21-ին, ժամը 04։30-ի սահմաններում բերման էր ենթարկվել Առուշ Առուշանյանը, որի մասին մի քանի ժամ էր՝ փաստաբանները տեղեկություն չունեին, հայտնի չէր անգամ, թե ինչ քրեական գործով եւ ինչ կարգավիճակով է քաղաքապետը բերման ենթարկվել։

Որոշ ժամանակ անց հայտնի էր դարձել, որ Առուշանյանը Երեւանի քննչական կոմիտեում է եւ հարցաքննվում է ապօրինի հավաքներ կազմակերպելու եւ անցկացնելու վերաբերյալ հարուցված քրեական գործով։