Իսպանիայի Տոռեմոլինոս քաղաքը ճանաչել է Հայոց ցեղասպանությունը

Իսպանիայի Անդալուսիա ինքնավար համայնքի Տոռեմոլինոս քաղաքը ճանաչել է Հայոց ցեղասպանությունը: Այս մասին տեղեկանում ենք Իսպանիայում ՀՀ դեսպանատան պաշտոնական ֆեյսբուքյան էջից:

Ինչպես հաղորդվում է, Տոռեմոլինոսի քաղաքային խորհրդի անդամ Նիկոլաս դե Միգելի ներկայացրած Հայոց ցեղասպանությունը ճանաչող միջնորդագրին կողմ են քվեարկել նաև Իսպանիայի իշխող սոցիալիստական կուսակցության (PSOE) անդամները։

Դեկտեմբերի 17-ին Իսպանիայի Կաստեյոն քաղաքի քաղաքային խորհուրդը միաձայն ընդունել էր Արարատ Հայկական միության ներկայացրած միջնորդագիրը, որով ճանաչել է Օսմանյան կայսրության կողմից իրականացրած հայերի Ցեղասպանությունը:

Ընդհանուր առմամբ, Ցեղասպանությունը մինչ օրս ճանաչել է 37 իսպանական քաղաք, որոնցից 11-ը շրջկենտրոններ են: Դրանց թվում են Մալագան, Սան Սեբաստիանը, Մերիդան, Բուրգոսը, Սորիան, Սաբադելը, Ալիկանտեն, Կաստեյոնը։ Հայոց ցեղասպանությունը ճանաչել են Իսպանիայի 5 մարզեր՝ Բասկոնիան, Կատալոնիան, Բալեարյան կղզիները, Նավառան և Արագոնը։