Եթե անգամ ժողովրդի 90%-ն իր հետ չհամաձայնի, Փաշինյանը նրանց ժողովուրդ չի համարի. Բորիս Մուրազի

Ուժ է անհրաժեշտ, որ Նիկոլ Փաշինյանին իր աթոռից պոկենք, քանի որ նրանք միաձուլված են: Ընդդիմությունը գործ ունի մահապարտի հետ, որն ամեն ինչ դրել է խաղասեղանին, այդ պայքարի մեջ պետք է համարժեք մտնել: Այս մասին այսօր Հանրապետության հրապարակում Tert.am-ի հետ զրույցում ասաց Politik.am կայքի գլխավոր խմբագիր Բորիս Մուրազին: 

«Ես կարծում եմ՝ ընդդիմությունը լավ հնարավորություն ուներ նոյեմբերի 9-ից մեկ շաբաթ հետո Նիկոլին հեռացնելու, հոգեբանորեն նա հեռացված էր, դրա համար թաքնվել էր, ընդդիմությունը հապաղեց, իսկ Նիկոլն իր իշխանությունը երկարաձգելու ելքը գտավ: Ես չեմ ասում, որ նա պետք է մնա, բայց նա փորձում է երկարաձգել, որի հետևանքները մենք տեսնում ենք»,- ասաց նա:

Արտահերթ ընտրությունների մասով Բորիս Մուրազին ասաց, որ եթե այն տեղի ունենա Փաշինյանի կազմակերպելով, ապա այն ձեռնտու կլինի նրանց: «Հասկանալի է, որ իր ընդդիմադիր տարիների գործունեության ընթացքում հնչեցրած բոլոր թեզերին հակառակ է գնացել այս  2,5 տարվա ընթացքում, իսկ սա նշանակում է, որ Նիկոլ Փաշինյանը կարող է նաև ընտրակեղծիքների գնալ և պետական ապարատը ծառայեցնելու է նրան»:

Նիկոլ Փաշինյանի այն հայտարարության մասին, թե ընդդիմությունը փորձում է գողանալ ժողովրդի ընտրության հնարավորությունը, վերջինս հիշեցրեց՝ դեռ մեկ տարի առաջ էլ ասել է՝ եթե Նիկոլ Փաշինյանի կողքին երեք հոգի էլ մնա, նա կհամարի, թե ժողովուրդն իր հետ է:

«Նրա համար ժողովուրդ են համարվում այն մարդիկ, որոնք համաձայն են իր քայլերի հետ: Մյուս բոլոր պարագաներում, եթե անգամ ժողովրդի 90 տոկոսն իր հետ չհամաձայնի, Փաշինյանը նրանց ժողովուրդ չի համարի: Եթե ընդդիմությունը կարծում է, որ դավաճանության արդյունքում հայրենիք ենք կորցրել, ապա առժամանակ պետք է Սահմանադրությունը մի կողմ դնել»,-ընդգծեց նա:

Ըստ նրա՝ Նիկոլ Փաշինյանն ընդունում է, որ պարտվել է պատերազմում և այս փուլում միայն մտահոգվում է իր աթոռը պահպանելու մասին, իսկ Սյունիքի հավանական կորուստը նրան չի հետաքրքրում: