Երևանի ավագանիում հրաժարականներ ու նշանակումներ են եղել

Այսօր Երևանի ավագանու նիստի ժամանակ քաղաքապետի առաջին տեղակալ Հրաչյա Սարգսյանն ասել է, որ «Իմ քայլը» խմբակցության անդամներ Հայկ Սիրունյանն ու Մեսրոպ Պապիկյանը դիմումներ են ներկայացրել՝ ավագանու անդամի լիազորությունները դադարեցնելու մասին:

Հիշեցնենք, որ ավելի վաղ «Իմ քայլից» հրաժարականի դիմում էր ներկայացել նաև Արսեն Կարապետյանը:

Քաղաքապետի առաջին տեղակալն ասել է, որ Արսեն Կարապետյանի, Հայկ Սիրունյանի ու Մեսրոպ Պապիկյանի մանդատները տրվել են ընտրական ցուցակի հերթական հաջորդ թեկնածուներ Սերգեյ Գյոզալյանին, Վահե Օհանջանյանի և Կարինե Փանոսյանին:

«Կարինե Փանոսյանը դիմում է ներկայացրել ավագանու անդամի լիազորությունները դադարեցնելու մասին: Համաձայն ԿԸՀ դեկտեմբերի 17-ի համար 26 արձանագարության՝ Երևանի ավագանու «Իմ քայլը» կուսակցությունների ընտրացուցակից ընտրված և լիազորությունները վաղաժամկետ դադարած ավագանու անդամ Կարինե Փանոսյանի մանդատը տրվել է «Իմ քայլը» դաշինքի ընտրական ցուցակի հերթական հաջորդ թեկնածու Գևորգ Աճեմյանին»,-ասել է քաղաքապետի առաջին տեղակալը:

Հրաչյա Սարգսյանը նաև հավելել է, որ «Իմ քայլը» խմբակցության անդամներ Էռնեստ Ավանեսովը, Սերգեյ Գյոզալյանը դիմումներ են ներկայացրել խմբակցության կազմից դուրս գալու մասին: Նրանք շարունակում են կատարել ավագանու անդամի իրենց լիազորություններն ու համապատասխան հանձնաժողովում աշխատանքը:

«Համաձայն Երևանի ավագանու «Բարգավաճ Հայաստան» խմբակցության ղեկավարի 24.11.2020 թվականի գրության՝ «Բարգավաճ Հայաստան» խմբակցությունը հրաժարվում է խմբակցությանը հատկացված՝ ավագանու Քաղաքաշինության և հողօգտագործման մշտական հանձնաժողովի նախագահի տեղակալի պաշտոնից: Երևանի ավագանիում Քաղաքաշինության և հողօգտագործման մշտական հանձնաժողովի նախագահի տեղակալ Մարկոս Հարությունյանը դիմում է ներկայացրել Քաղաքաշինության և հողօգտագործման մշտական հանձնաժողովի նախագահի տեղակալի լիազորությունները դադարեցնելու մասին», – ասել է Հրաչյա Սարգսյանը: