Ապօրինություն է գիշերը ժամը 5-ին քաղաքապետին տնից հանել եւ թեթեւ հոդվածի կասկածանքով բերման ենթարկել. Մելիքյան

Խայտառակ ապօրինություն ենք համարում այն, ինչ կատարվեց Գորիսի քաղաքապետ Առուշ Առուշանյանի հետ։ Այս մասին այսօր՝ դեկտեմբերի 21-ին, լրագրողների հետ զրույցում նշեց իրավապաշտպան Ռուբեն Մելիքյանը:

Նա հայտնեց, որ մի շարք փաստաբաններ, որոնք պատիվ են համարում ստանձնել Առուշ Առուշանյանի պաշտպանությունը, պատրաստվում են առաջարկել, որ իրենց նույնպես ներգարվվեն այս վարույթին՝ որպես պաշտպան։

«Սա մասնագիտական կողմից բացի՝ նաեւ քաղաքացիական դիրքորոշում է, որովհետեւ մենք խայտառակ ապօրինություն ենք համարում այն, ինչ կատարվեց Առուշ Առուշանյանի հետ։  Խայտառակ ապօրինություն է գիշերը ժամը 5-ին ժողովրդի 90 տոկոսի ձայն ստացած քաղաքապետին տնից հանել եւ թեթեւ հոդվածի կասկածով, ավելի թեթեւ հոդված Քրեական օրենսգրքում չկա՝ ապօրինի հավաքներ կազմակերպելու փորձ եւ  բերման ենթարկել: Այսինքն՝ մի բան, որով երկուսուկես տարի ամեն օր զբաղված էր այն մարդը, ով այսօր անփառունակ ձեւով Սյունիքից փախուստի դիմեց»,- ասաց Մելիքյանը եւ ընդգծեց, որ Առուշանյանը համաձայնել է, որ նաեւ այլ փաստաբաններ ներգրավվեն եւ իր պաշտպանությունն իրականացնեն:

Ռուբեն Մելիքյանն ասաց՝ այն հանգամանքը, որ 6-7 ժամ հետո փաստաբաններն ահազանգում են, որ չգիտեն՝ որտեղ է գտնվում իրենց վստահորդը, արդեն իսկ նշանակում է, որ կոպտագույն խախտում է առկա, որովհետեւ ազատությունից զրկված անձի նվազագույն օրինակներից ամենակարեւորներից մեկն անմիջապես փաստաբանի հետ կապվելու հնարավորությունն է:

Նա նշեց, որ այդ գործընթացում դատավարական բնույթի խախտումներ են տեղի ունեցել, որոնք, ըստ իրավապաշտպանի, պարտադիր պետք է արձանագրել։

«Ընտրված քաղաքապետը, հայրենիքի զինվորին, մարդուն, ով այսքան ժամանակ պաշտպանում եւ փորձում է իրականացել այն, ինչը տապալել է իրեն ձերբակալելու հրաման տված անձը՝ Նիկոլ Փաշինյանը, այդ մարդուն այդպես խայտառակ ձեւով ձերբակալել եւ բերել հասցնել Երեւան, դա հնարավոր բոլոր կարմիր գծերից այն կողմ էր։ Մենք էլ մեր մասնագիտական աջակցությունն ենք աջակցելու եւ մեծ պատիվ ենք համարելու որպես պաշտպան ներգրավվելու»,- ընդգծեց Մելիքյանը։

Նշենք, որ քիչ առաջ հայտնի դարձավ, որ Առուշ Առուշանյանը ձերբակալվել է ՀՀ ՔՕ 34-251 հոդվածի 1-ին մասի հատկանիշներով հարուցված քրեական գործի շրջանակներում։ Քրեական գործն ընդունվել է ՀՀ քննչական կոմիտեի ՀԿԳ քննության գլխավոր վարչության վարույթ, կատարվում է նախաքննություն: Նշենք

Այս պահին Քննչական կոմիտեի բակում հավաքվել են մի շարք իրավապաշտպաններ, քաղաքացիներ՝ ի աջակցություն Գորիսի քաղաքապետի։

Հիշեցնենք, որ երեկ Առուշ Առուշանյանը հայտարարել էր, որ այսօր առավոտյան Գորիսի դարպասների մոտ են լինելու եւ թույլ չեն տալու Նիկոլ Փաշինյանի մուտքը Սյունիք, ինչից հետո էլ նրան բերման էին ենթարկել։