Հիշում ենք 90-ականների առևանգումները, հիմա մենք ի՞նչ երաշխիք ունենք, որ վաղը ես իմ երեխային, մորը ուղարկեմ մայրաքաղաք՝ թշնամու «սնայպերը» չի աշխատի. Սյունիքի բնակիչ

Մեր պահանջը Սյունիքի սահմանների անվտանգության երաշխավորությունն է, մենք ապրում ենք այստեղ և նպատակ չունենք այլ տեղ գնալու. Սյունիքի մարզում շարունակվում են սահմանների անվտանգության հարցով ակցիան: Փոխանցում է Tert.am-ը:

Քաջարանի հասարակական կազմակերպության փոխնախագահ Դավիթ Համբարձումյանի խոսքով՝ նոյեմբերի 9-ի ստորագրված հայտարարության համաձայն՝ պետք է զինված ուժերը կանգնեին այն դիրքերում, որտեղ կռիվը վերջացել էր, սակայն հիմա, իր խոսքով,  օդանավակայանը և միջպետական ճանապարհը սահմանակից են Ադրբեջանին.

«Ոնց են պատկերացնում թշնամուց 300 մետր հեռավորության վրա օդանավակայանը և միջպետական ճանապարհը՝ ուղիղ գծով, մենք պետք է իրենց հետ ապրենք, արյունը դեռ չի չորացել: Ես համոզված եմ, որ վեճեր են լինելու, որովհետև բոլոր ընտանիքներում հարազատ զավակ են կորցրել, ինչպե՞ս կարող է այդ գյուղում կոնֆլիկտ չլինել: Հիմա Կապանը դառնում է սահմանակից, թող գան երաշխավորվեն, որ քայլեր են լինելու, անորոշության մեջ ապրելը ճիշտ չէ, եթե ասում ենք, որ Սյունիքը Հայաստանի ողնաշարն է, ես վստահաբար ասում եմ, որ մեր ողնաշարն արդեն թուլացել է: 90-ականների տղաներն են նաև այստեղ, ես նրանց աչքերում հիասթափություն եմ տեսնում»:

Նրա խոսքով` իրենք անվտանգության երաշխավորությունը Հայաստանի կամ Ռուսաստանի կողմից է.

«Մամուլից տեղեկացա, որ 21 կմ ճանապարհի ձախակողմյան մասը՝ մինչև Որոտանի հատվածը,  հայտնվել է նրանց սահմանին կից, մենք հիշում ենք 90-ականների առևանգումները, հիմա մենք ինչ երաշխիք ունենք, որ վաղը ես իմ երեխային, մորը ուղարկեմ մայրաքաղաք՝ «սնայպեր» չի աշխատի, հետո պիտի ասեն՝ դե եղավ, մեկ- երկու դեպք է եղել, մեր փոքր ազգի համար երեք դեպքն էլ բավական է: Մենք միայն  անվտանգության երաշխիքներն ենք ուզում: Ովքեր մեծ -մեծ խոսում են, թող գան Սյունիք, 15 րոպե «պոստ» կանգնեն, ոչ թե ասֆալտների վրա նկարվեն: Եթե մեկը համարձակվի այս ելույթիս տակ գրի «պիցայակեր» կամ այլ բան, հանկարծ ինձանից չնեղանա, մենք միայն պահանջում ենք անվտանգություն»:

Աղբյուր՝ Tert.am