Ես ինձ համարում եմ այս իրավիճակի թիվ մեկ պատասխանատուն, բայց չեմ համարում թիվ մեկ մեղավորը. Նիկոլ Փաշինյան. Տեսանյութ

Արդեն ասվել էր, որ պետք է բոլորը փոխանակվեն բոլորի հետ, և ես կարծում եմ, որ ստեղծված իրադրությունում դա ճիշտ որոշում է: Այս մասին Azatutyun.am-ի հետ զրույցում ասաց Նիկոլ Փաշինյանը՝ անդրադառնալով գերիների վերադարձին: Նա նշեց, որ այդ որոշման արդյունքում Հայաստան վերադարձվեցին անձիք, որոնք Ադրբեջանում դատապարտված էին:

Փաշինյանը նշեց, որ մեր քաղաքացիների վերադարձնելու համար կայացրել են այդպիսի որոշում, ծանր որոշում: «Հաստատված դեպքերի փոխանակումն ավարտում ենք և պետք է շարունակենք պրոցեսը չհաստատված դեպքերի անձանց շուրջ»,-ասաց նա:

Անդրադառնալով իր հրաժարականի պահանջին՝ Նիկոլ Փաշինյանը նշեց, որ նաև տեսնում են մարդկանց խմբեր, ովքեր պահանջում են հրաժարական չտալ: «Իմ գնահատականն այն է, որ վարչապետի կարգավիճակում ես նաև ժողովրդի իշխանություն ձևավորելու հնարավորության և լիազորության պահպանողն եմ: Ես չեմ կարող թույլ տալ, որ ժողովուրդը կորցնի իշխանություն ձևավորողի իր կարգավիճակը»,- ասաց նա և նշեց, որ ժողովուրդը այդ կարգավիճակը տվել է ի պահ:

«Ես հայտարարել եմ, որ ինձ համարում այս իրավիճակի թիվ մեկ պատասխանատու, բայց ուզում եմ, որ պատասխանատու և մեղավորը չշփոթել իրար հետ: Հիմա, երբ հայտարարում եմ, որ պատասխանատուն եմ, այս իրավիճակի բոլոր, այդ թվում առաջնային մեղավորները փորձում են 25-30 տարի իրենց չարածի և ընդհակառակը՝ հակապետական իրենց գործունեության մեղավորությունը բարդել մեզ վրա: Այս երևույթը պետք է կոնկրետ գնահատականի արժանանան: Ի վերջո, Հայաստանի նախկին և ներկա պաշտոնյաներից էլ քանի հոգի են միլիոնատեր, Եվրոպաներում, օֆշորներում, Ամերիկաներում ունի առանձնատներ, ներդրումներ»,- ասաց նա և նշեց, որ դա չի նշանակում, որ ինքը ասում է, որ մեղավոր չէ:

«Ես ինձ համարում եմ թիվ մեկ պատասխանատուն, բայց չեմ համարում թիվ մեկ մեղավորը, բայց դա չի նշանակում, որ ես մեղավոր չեմ, ես ասում եմ՝ թիվ մեկ պատասխանատվությունը և թիվ մեկ մեղավորությունը չխառնել»,-ասաց նա:

Նիկոլ Փաշինյանը նաև նշեց, որ իր մեղավորությունն այն է, որ այս 2,5 տարվա ընթացքում չեն լուծվել բազմաթիվ հարցեր, որոնք կարող էին ավելի լավ լուծվել: Նա նշեց, որ արտահերթ ընտրությունները միայն իր կամքով չեն կարող լինել, դրա շուրջ համաձայնություն պետք է ձեռք բերվի և առաջնահերթ խորհդարանական ընդդիմության հետ: