ՀՀ-ի հետ սահմանները ճշգրտվում են խորհրդային ժամանակներից գոյություն ունեցող քարտեզների հիման վրա, իսկ GPS սարքերն օգտագործվում են կոորդինատները ճշգրիտ տեղանշելու համար. Նիկոլ Փաշինյան
Արցախի Հին Շեն գյուղի շուրջ իրավիճակն արդեն հանգուցալուծվել է, այդ հատվածում իրավիճակը հանգուցալուծվում է, այդ խնդիրը լուծված է արդեն և գտնվում է լուծման փուլում: Այս մասին Azatutyun.am-ի հետ զրույցում ասաց Նիկոլ Փաշինյանը:
«Խնդիրն այն է, որ կա պայմանավորվածություն, որ Լաչինի միջանցքում չպետք է լինեն ո՛չ ադրբեջանական, ո՛չ էլ հայկական զորքերի ստորաբաժանումներ և ամբողջությամբ Լաչինի միջանցքը պետք է լինի ռուս խաղաղապահների վերահսկողության ներքո: Հիմա խնդիրն այն է, որ այդ պրոցեսը պետք է տեղի ունենա սինխրոն՝ խոսքը զինված ստորաբաժանումների մասին է, խոսքը գյուղերի մասին չէ»,- ասաց նա և նշեց, որ գյուղերը խաղաղապահների պատասխանատվության գոտում են, և մարդիկ պետք է շարունակեն այդտեղ ապրել:
Անդրադառնալով Սյունիքի սահմաններին՝ Նիկոլ Փաշինյանն ասաց, որ պետությունը կանգնած է մեր հայրենակիցների թիկունքին, և ամբողջ պրոցեսը կառավարվում է ԶՈՒ գլխավոր շտաբի կողմից:
«Եղել են դրվագներ, երբ հաղորդակցություններ են տեղի ունեցել, ՏԻՄ ներկայացուցիչները նույնպես իշխանության ներկայացուցիչներ են և ոչ մի տարօրինակ բան չկա, որ նրանք նույնպես կարող են լինել հաղորդակցության մեջ»,- ասաց նա:
Նիկոլ Փաշինյանը հայտարարեց, որ, ընդհանուր առմամբ, Սյունիքի հատվածներում պետք է իրականացնենք սահմանների ճշգրտում:
«Կարևորագույն խնդիր է Հայաստանի և Արցախի շուրջ կայունություն ապահովել»,- ասաց նա և նշեց, որ այս պրոցեսները բարդ պրոցեսներ են, և մենք պետք է անպայման անցնենք դրանք և իրադրությունը կայունացնենք:
Նիկոլ Փաշինյանը նաև հայտարարեց, որ այդ սահմանները ճշգրտվում են խորհրդային ժամանակներից գոյություն ունեցող իրավական ուժ ունեցող քարտեզների հիման վրա, իսկ GPS սարքերը օգտագործվում են քարտեզի վրա նշված կոորդինատները ճշգրիտ տեղանշելու համար: Նա նշեց, որ Արցախի հարցը առանձին հարց է, և դրա շուրջ ԵԱՀԿ Մինսկի խմբի շուրջ պետք է բանակցությունները վերսկսեն, ինչի առաջին քայլերը տեսնում ենք, և Արցախի կարգավիճակը պետք է ճշգրտվի այդ համատեքստում:
Հետևեք մեզ Facebook-ում