Կրեմլում մեկնաբանել են ասեկոսեները, որ, իբրեւ, Պուտինը կորոնավիրուսի համավարակի ժամանակ ապրում է բունկերում

Ռուսաստանի նախագահի մամուլի քարտուղար Դմիտրի Պեսկովը հերքել է տեղեկությունները, որ Վլադիմիր Պուտինը կորոնավիրուսի համավարակի պայմաններում ապրում է բունկերում. նրա խոսքով՝ երկրի ղեկավարն ապրում է Նովո-Օգարեւոյի իր ամառանոցում, հաղորդում է «Ինտերֆաքս»-ը:

«Ոչ, Պուտինն այժմ բնակվում է Նովո-Օգարեւոյում, որտեղ եւ ապրել է նախքան համավարակը»,-ասել է Պեսկովը «Ռոսսիա 1» հեռուստաալիքի «Վտանգավոր վիրուս: Առաջին տարի» ֆիլմում՝ մեկնաբանելով կարծիքը, որ նախագահն ապրում է բունկերում եւ այդտեղից ղեկավարում երկիրը:

Նրա խոսքով՝ Պուտինն «այնտեղ հաճախ է աշխատում, այնտեղից է գալիս Կրեմլ, այնտեղից է մեկնում գործուղումների, տեխնոլոգիական լուծումները նրան նոր պատկերացում են տալիս այն վայրերում ներկա գտնվելու, որտեղ նրան անհրաժեշտ է»:

Պեսկովը նաեւ պատմել է, որ նախագահը հանձնում է COVID-19-ի թեստ այնքան հաճախ, որքան պահանջվում է անվտանգությունն ապահովելու համար:

«Նա թեստավորվում է այնքան, որքան անհրաժեշտ է երկրի ղեկավարի անվտանգությունն ապահովելու համար»,-նշել է մամուլի քարտուղարը՝ պատասխանելով հարցին՝ արդյո՞ք Պուտինն ամեն օր է հանձնում կորոնավիրուսի թեստ:

Պեսկովի խոսքով՝ Նովո-Օգարեւոյի նստավայրում, որտեղ ապրում է Պուտինը, կան բժիշկներ, համաճարակաբաններ եւ այլ մասնագետներ, որոնք կազմում են երկրի ղեկավարի միջոցառումների ժամանակացույցը բժշկության տեսանկյունից:

Ավելի վաղ օպերատիվ շտաբը հայտնել էր, որ Ռուսաստանում վերջին օրվա ընթացքում COVID-19-ով վարակվել է 28 080 մարդ: Մասնավորապես, Մոսկվայում գրանցվել է 6 425 նոր դեպք: