Այս կառավարության մնալու դեպքում Արցախի ճակատագիրը սպառնում է նաև մեզ. Ծառուկյան. Տեսանյութ

Ինձ համար անձերը կապ չունեն, կապ ունի արդյունքը, իրականությունն այն է, որ այսօր այս ճակատագրին արժանացանք: Այս մասին այսօր լրագրողների հետ հանդիպման ժամանակ ասաց «Բարգավաճ Հայաստան» կուսակցության նախագահ Գագիկ Ծառուկյանը՝ խոսելով պատերազմի ընթացքում Կառավարության սխալների, դրա հետևանքների և Նիկոլ Փաշինյանի հրաժարականի մասին: 

Ծառուկյանը խոսելով վերջին շրջանում առաջացած խնդիրների, մասնավորապես Արցախի պատերազմի, հանձնված հողերի, Կառավարության անգործության մասին՝ նշեց, որ այս ամենի մասին դեռ մի քանի ամիս առաջ էր խոսում: «Հունիսի 5-ին ներկայացրել եմ, ասել եմ, որ մենք անդունդի եզրին կանգնած ենք սոցիալական, տնտեսական, քաղաքական, համաճարակի և Արցախի հարցով, որ պետք է ամբողջ Կառավարությունը փոխվի, եթե չէ՝ մենք ընկնելու ենք անդունդը»:

Ըստ նրա՝ այս իրավիճակից դուրս գալու համար հստակ քայլեր պետք է ձեռնարկվեն, փոփոխություններ պետք է լինեն և այդ ամենը պետք է ղեկավարվի մի մարդու կողմից, որը լիարժեք կկարողանա ցանկացած հարցի ճիշտ լուծում տալ:

«Այսքան անտուն մարդիկ, այսքան սգացող մարդիկ կան, որ հայրենիք են կորցրել, զավակ են կորցրել, ամուսին են կորցրել, կորցնողներ կան, որ երազում են դիակը գտել, որ լացելու տեղ լինի. սա է հիմա մեր ազգի վիճակը»,-ասաց նա:

ԲՀԿ ղեկավարը շեշտեց, որ իր հայտարարությունից հետո քաղաքական հետապնդում եղավ իր նկատմամբ, սակայն այդ ժամանակ ևս նշել էր, որ ծառացած խնդիրները լուծելու համար 3-4 ամիս ժամանակ կա, սակայն նրա խոսքով՝ անփորձ երիտասարդները չեն հավատացել նրա խոսքին, բայց այսօր հենց այդ անփորձ, ինքնահավան երիտասարդներն են խոսում հայ ազգի ճակատագրի մասին:

«Կամ չեն հասկանում, չեն տիրապետում կամ իրենք գիտակցելով են բերել, սրան հասցրել: Երկուսից մեկն է, թող իրենք պատասխանեն: Նորից եմ ասում՝ անձերն ինձ համար կապ չունեն, այսօր երկրի այս վիճակի համար պատասխանատու է Կառավարությունը»,- շեշտեց Ծառուկյանը և հավելեց, որ այսօր իր բոլոր առաջ բերված հարցերի պատասխանն է ուզում ստանալ:

Zham.am