120 մլն դոլար պարգևավճարը ստացել են նաև ՊՆ, ԱԻՆ, առողջապահության համակարգի աշխատողները. Վիկտոր Ենգիբարյան

Ամենաշահարկված թեման բյուժետային առումով մեր մամուլում և քաղաքական դաշտում պարգևավճարներն են, ու կա մի հայտնի քաղաքական գործիչ, որը մի քանի հարցազրույցներում նշել է 120 մլն դոլար պարգևավճարների մասին։ Այս մասին այսօր ԱԺ նիստում ասաց «Իմ քայլը» խմբակցության պատգամավոր Վիկտոր Ենգիբարյանը՝ դիմելով Ֆինանսների նախարար Ատոմ Ջանջուղազյանին։

«Դրանք քանի որ լայնորեն մանիպուլացվում են, այնպիսի տպավորություն է ստեղծվում, որ մեր իշխանությունը, 120 մլն դոլար պարգևավճար է ստացել։ Ես կոպիտ հաշվարկ եմ անում, որ 88 պատգամավոր գումարած կառավարության անդամներ՝ փոխնախարարներ մարզպետներ, այսինքն՝  մեր քաղաքական թիմը, ստացվում է 120-200 հոգի ու այս թիվը բաժանելով այդ պաշտոնյաների միջև, ստացվում է, որ մենք ամեն մեկս տարեկան 600․000-ից 1 մլն դոլար պարգևավճար ենք ստացել։ Ինձ սկզբից թվաց, որ նման բան կարող է լինել, քանի որ չէի հավատում, որ հայտնի անձը կարող է նման մանիպուլյացիայի դիմել։ Մտածեցի՝ գուցե բոլորը ստանում են բացի ինձնից։ Բայց հետո իմ ընկերներին հարցրի՝ դուք ստանում եք 600․000-ից 1 մլն դոլար պարգևավճար, բոլորն ասացին, որ ոչ։ Ես կուզեի, որ այս շահարկված թեմային որպես կառավարության անդամ տաք պատասխան։ Ովքե՞ր են կոնկրետ այն խմբերը, որոնք, այնուամենայնիվ, ստանում են այդ պարգևավճարը, քանի՞ հոգի է կազմում մարդկանց թիվը, որոնք ստանում են, և ընդհանուր գնահատական տանք՝ ինչ իմաստ ունի ստանալ այդքան պարգևավճար։ Օրինակ, եթե բարձրաստիճան պետական պաշտոնյաներ պարգևավճարները բաժանենք մեր թոշակառուներին, որքա՞ն կբարձրանա մեկ անձի կենսաթոշակը։ Ես կիսում եմ ձեր տեսակետը։ Ստացվում է, որ այդ պարգևավճարների գումարը, որը վերագրվում է մեր քաղաքական իշխանությանը, որը մոտավորապես 200 հոգի անձ է՝ բարձրաստիճան պետական պաշտոնյաներ են, իրականում ստացել է 19 հազար 709 անձնավորություն, որոնք մեր պետական կառավարման ամբողջ համակարգի աշխատակիցներն են։ Խմբերի մասին ասելիս նկատի ունեի, որ մեր հանրությունը կարողանա գնահատական տալ, որովհետև մենք հաշվետու ենք։ Օրինակ, այդ պարգևավճարները ստանում են պաշտպանության նախարարության, առողջապահության նախարարության աշխատակիցները,  ԱԻՆ աշխատակիցները, որոնք հիմա այս ճգնաժամային փուլում են աշխատում։ Այսինքն՝ սա պետական կառավարման ամբողջ համակարգն է, իսկ այս 19 հազար 709-ը մարդիկ մեր պետության քաղաքացիներն են, որոնց խրախուսելու միջոցով մենք փորձում ենք պետական կառավարման համակարգ ներգրավել ավելի լավ կադրերի, որպեսզի կարողանանք պահանջել և ստանալ ավելի լավ արդյունք»,– ասաց նա։

Ի պատասխան՝ Ջանջուղազյանն ասաց, որ թվերն անհամադրելի են կենսաթոշակառուների թվի հետ։

«Միջին ամսական վարձատրության չափն ընդհանրապես 370 հազար դրամ է, որն ունի երկու բաղկացուցիչ՝ աշխատավարձն առանձին 277 հազար դրամ է,  ընդամենը պարգևավճարները՝ ներառյալ նաև քաղաքացիական ծառայողների պարգևավճարները, 93 հազար դրամ է։ Կա ռիսկ այս 370 հազար դրամ միջին վարձատրության պայմաններում ունենալ սերուցքի արտահոսք։ Պետք չէ մեղադրել, որ մարդիկ իրենց աշխատուժը համարժեք են գնահատում։ Որպես կանոն բարձր արդյունք արձանագրող աշխատողի համար ցանկացած ղեկավար պատրաստ է հոգի տալ։ Եթե կհամարենք, որ 370 հազար դրամը մեր կառավարման համակարգին չի համապատասխանում, մեր սպասված պահանջներին, այն կարելի է վերանայել, բայց մեր կարծիքով, այն բարձր չէ։ Խոսքը վերաբերում է միայն կառավարման համակարգին, 19 հազար 709-ը ամբողջ բյուժետային հատվածը չի և ուժային կառույցները՝ օրինակ պաշտպանության դեպքում»,– ասաց նա։

Աղբյուր՝ NEWS.am