Եվրոպայի առաջնությունից հետո կմասնակցեմ միջազգային հավաքի. Լիլիթ Պողոսյան

Հայաստանի առաջատար բադմինտոնիստ Լիլիթ Պողոսյանը պատրաստվում է Դանիայի Կոլդինգ քաղաքում կայանալիք Եվրոպայի առաջնությանը: ՀԱՕԿ լրատվականի հետ զրույցում Պողոսյանը նշել է, որ այժմ ավելի լավ մարզավիճակում է, քան նախորդ տարի.

«Այժմ մարզվում եմ հորս` Հրաչյա Պողոսանի գլխավորությամբ: Մեզ օգնում է ԱՄԷ-ից ժամանած մի մարզիչ` Ալի Դաշտհանին: Նա Հայաստան է եկել հանգստանալու նպատակով, բայց իմանալով իմ մասին` օգնում է ինձ պատրաստվել Եվրոպայի առաջնությանը: Կմարզվենք մինչեւ ապրիլի 23-ը, իսկ հաջորդ օրը կմեկնեմ Դանիա:

Մարզվում եմ օրական երկու անգամ: Ուշադրություն ենք դարձնում տեխնիկային, տակտիկային, ֆիզիկական պատրաստվածությանը: Նախորդ տարվա համեմատ շատ ավելի լավ մարզավիճակում եմ: Կարծում եմ` հաջող հանդես կգամ առաջնությունում»,- աասել է բադմինտոնիստը:

Պողոսյանն աշխարհամասի առաջնությունից հետո Դանիայի մեկ այլ` Հոլբեկ քաղաքում կմասնակցի Եվրոպայի կոնֆեդերացիայի կազմակերպած հավաքին: Նա ընտրվել է «Centre of Excellence» ծրագրի անդամ.

«Առաջնությունից հետո հնգօրյա հավաք կունենանք նույն երկրում: Կծանոթանանք մարզիչների հետ, նաև ծրագրի պայմաններին: Իսկ սեպտեմբերից պետք է մարզվեմ և սովորեմ Դանիայում: Այլ երկրներից ևս 10-11 մարզիկ է ընդգրկված այդ ծրագրում: Օրական երկու մարզում կունենանք:

Եվրոպայի կոնֆեդերացիայի հավաքին մեկ անգամ արդեն մասնակցել եմ: Մեծ փորձ եմ կուտակում: Տարբեր երկրներից ուժեղ մարզիկների հետ խաղալով, ավելի եմ հմտանում: Իսկ Հայաստանում բոլորի խաղը շատ լավ գիտեմ, մրցակցություն չկա:

Գլխավոր նպատակս` 2020 թվականի Տոկիոյի օլիմպիական խաղերին մասնակցելն է»,- նշել է Լիլիթ Պողոսյանը:

Բադմինտոնի Եվրոպայի առաջնությունը կկայանա ապրիլի 25-30-ը: